Ka Agatha, kum ka MDC shu sieh

Shillong, 31 Jymmang:
Kham mynshuwa ka NPP kaba ialam khmat ia ka kynhun synrop kaba synshar ha GHADC ka la phah ia ka kyrteng u Conrad K Sangma kum u MDC shu sieh bad ka la don jingthmu ruh ban wanrah ia u Conrad kum u CEM ka GHADC, hynrei ka sorkar jylla ka la pynslem ban mynjur ia ka kyrteng u Conrad tad haduh ban da poi ka sngi iap u Purno A Sangma bad ka la wan sa ka elekshon shiteng samoi bad katei ka seng ka la phah noh da u Conrad ban ia khun ha katei ka elekshon bad u la jop donburom.
Hadien ka jingjop jong u Conrad ka kynhun synrop kaba synshar ha GHADC kam pat shym la jied thymmai iano kan phah kum u MDC shu sieh. Haba ia kren bad u Conrad ha ophis jong ka NPP ha kine ki khyn diat sngi ba la dep halor katei ka kam u la ong ba ia ka kam ban jied ia u MDC shu sieh ha kane ka kynti ka NPP kan shim hi da ka rai lajong hynrei kan ailad beit ha ki sengsaiñ pyrthei kiba ia donlang ha ka kynhun synrop ha GHADC ba kin jied kat ia uba ki imon.
“Ngim kwah ban leh na ka seng NPP, ngi kwah ban leh da ka jing ia sngewthuh jingmut lang bad kiwei pat ki seng kiba donlang bad ngi ha GHADC bad kiba la kyrshan ruh ha kane ka elekshon ba dang shu dep” ong u Conrad. Haba la kylli biang na u Conrad hato ka don ne-em ka jingthmu ban phah da ka kyrteng ka Agatha Sangma ka para jong u , “Ia kata ngam lah ban batai lypa ka shong ha ka jingjied jong ki Party ba ngi ia treilang” u la ong. Hynrei haba twad jingmut na kiwei pat ki nongialam ka NPP na ri Lum Garo ki la iathuh ba ki lah ban phah da ka Agatha Sangma kum ka MDC shu sieh namarba ka la don lypa ka jingmut jong katei ka seng ban pyniakhun ia ka ha ka elekshon MLA 2018.