47snem, ka seng khynnah Seng Khasi

Shillong, 30 Jymmang:
Ka Seng Khynnah ka Seng Khasi (Kmie), Mawkhar, ka la kam ia  u mawmer  ka jingdap ba 47 snem pura naduh ba la seng ïaka.
Ka Seng Khynnah, ka dei ka shlem ai jinghikai, ïa ki khun ki siew ka bri u Hynñiewtrep u Hynñiewskum ba dang bat ba dang snoh ha la ka jong ka niam tynrai kaban hikai shaphang ka niam ba tip briew ba tip Blei jong u  Khasi.
Iaka jinghikai ia kine ki khynnah la juh pynlong ïaka shi sien ha ka shi taïew kata man la ka sngi Robibar, ha ïing seng ha Mawkhar, ha kaba ka komiti jong ka Seng Khynnah ka don ïala ki nonghikai kiban ïa sam lem sha ki khynnah ba dang rit, ban pynskhem ha ki ïaka jingmut ba kin long kiba la khreh ban kieng ban deng ha ka met ka longryieng ka jong ki  ha kata ka nongrim jinghikai ban ‘kamai ïaka hok’.
Ia kane ka jingrakhe ïa kane ka jingap ba 47 snem, la pynlong ïaka hynnin ka sngi ka 29 tarik u Jymmang, ha ïing seng ha Mawkhar.
U Kongsan ba la wan ban don lang ha kane ka sngi dei u Rgh Spiton Kharakor ba dei artad u Secretary jong ka Seng Khynnah.
Haba kren kum u kongsan, u Rgh Spiton u la ïathuh khyndiat shaphang ka history  shaphang ki daw ba balei ba la hap ban seng ïaka seng khynnah, nangta ula ïathuh ruh ïa ki lynti ïaid bad ïa kiba bun ki khun samla rangbah kiba ka jingwan ba tista bha ka jong ki sha kane ka seng khynnah, mynta ki kylla long ki briew kiba nang kiba stad bad kiba la roi parum pareh hala ki jong ki kam ki duk ba ki trei.
Haba phai sha ki khynnah ba mynta u Rgh Spiton u la ban jur ïa ki ba kidei ban wan tista sha ka seng khynnah, ha ka juh ka por ban kyntu ïala ki kmie ki kpa ba ma ki ruh kidei ban ialam lynti ïala ki khun ba kin poi tista sha ka seng khynnah, khnang ba ka lawei jong ka Seng Khasi kan ïai neh bad kan im junom la junom.
Ha shwa ban sdang ka prokram rakhe, la ïoh ruh ïaka nguh ka dem, ba la ai da u Secretary ka komiti u Tymmen U San ka Seng Khasi u Rgh Kworshon Marbaniang, ïa kaba la pynbud da ki prokam  jingpule ïaka sneng tymmen, ka jingrwai, hynrei ka prokram kaba kongsan jong kane ka jingrakhe ka dei ka jingsam khusnam sha baroh ki khynnah kiba wan tista bad bym juh pep ban wan sha ka seng khynnah.
Kiba la wan ban don lang ha kane ka sngi rakhe ka kynthup ia u Rgh P.S Dkhar,  Vice President Seng Khasi, u Rgh Arwan .S. Tariang Secrertary Seng Khasi, ki dkhot jong ka JPK, u Rgh H. Robin Kurbah President Seng Khihlang, kong Sweetymon Rynjah, kong Silbi Passah, ki dkhot jong ka Seng Kynthei ka Seng Khasi (Kmie), ki samla lem bad ki kmie ki kpa jong ki khynnah.