Sahkut ka jingthmu pynkhyllem ki MLA ia U Mukul

Shillong 29 Jymmang: Ka jingthmu jong ki MLA ka Congress ban pynkhyllem noh ia u Mukul Sangma kumu Myntri Rangbah ka jylla,ka la sahkut noh hadien ba u heh ka AICC uban phah khubor sha ka Sonia Gandhi u V Narayanasamy u la hap ban shimti Myntri Rangbah noh ha ka Puducherry ka Union Territory.
Katkum ka jingtip ba la iohlum, ha ka jing shisha ki MLA pyrshah ia u Mukul kila buh jing ialang ha iingsah jong u Bah DD Lapang ha kane ka sngi Saitjain hynrei bun ki MLA ki la poi duna hadien ba ki la ioh ia kane ka khubor ba u heh ka AICC u la shah bynshet da kawei ka kam bad la hap ban pynsangeh noh ia ka jingialang.
Kumba ka paw, ka jingiakhih jongki ban weng noh ia u Dr Mukul na ka shuki, kan sahkut shwa.
Ka khubor ba la iohlum, ka la ong ba ki MLA pyrshah ia u Mukul, ki la don ka jingthmu ban buh biang ia u Bah Lapang kum u Myntri Rangbah lada kin lah shisha ban pynkhyllem noh ia u Mukul Sangma. Wat ka kyrteng jong u S C Marak ruh ka la paw kum uwei ban lah ban shimti ia ka kam Myntri Rangbah.
Namar kane ka jingkylla jong u ksiang ka AICC hangne ha Meghalaya, la sngewthuh ba ki MLA kiba kwah ban weng ia u Mukul Sangma kin hap ap haduh ban ioh da uwei pat u ksiang ban thung na Delhi.
U Myntri Rangbah barim ka jylla u Salseng C Marak ha ka jingiakren, u la kubur ba la don ki MLA ka Congress kiba la pynpaw ia ka jingbym shaniah ia u Mukul Sangma hynrei ka party kan sa iakren ban pynbeit ia kane.