Pynim ka shnong Rongmesek ia ka ‘Krut Lyngkha’ ka rukom rep ki mynbarim

Nongpoh, 27 Jymmang: Da ka jingthmu ban pynsah jingkynmaw ia kawei na ki rukom rep tynrai da ki jaid bynriew Karbi ha shwa ba kin bet ia u symbai kba sha ki lyngkha, kaba la tip kum ka ‘Krut Lyngkha’, mynta ka sngi ki briew jong ka shnong Rongmasek, ki la pynkhie im biang ia katei ka rukom rep tynrai kaba la ialam da ki longshwa manshwa ha u Lum Mawshawing jong ka shnong Rongmasek, Ri Bhoi District.
Ka ‘Krut Lyngkha’ kaba dei kawei na ki rukom rep tynrai jong ki jaid bynriew Karbi ha ka them Ri Bhoi, ha kaba kitei ki jaid bynriew ki ju pynlong ia katei ka rukom leh tynrai ryngkat bad ka Nguh ka Dem ban duwai phirat ia u Blei nongbuh nongthaw hashwa ba kin bet ia u symbai kba sha ki lyngkha.
Ha kane ka sngi, da ki phew ngut ki nongrep kynthei bad shynrang jong ka shnong Rongmasek ki la iashim bynta da ka jingshongshit ban pyni ia ka dak jong ka jingburom ia kaei kaba la ialam da ki longshwa manshwa, kiba la pynlong ia katei ka rukom rep tynrai ha shwa ba kin bet ia u symbai kba ha ki lyngkha ki risai.
Haba iakren bad u Bah Albinus Timung, rangbah shnong ka Rongmasek, u la ong ba ka jingthmu jong ka shnong ban pynkhie im biang ia katei ka ‘Krut Lyngkha’ ka dei tang ban pynsah jingkynmaw ia ki longdien mandien khnang ba kin tip ia kaei kaba ki longshwa manshwa ki leh hashwa ba kin bet ia u symbai.
“Hooid kum ki nongshong shnong ngi tip ba kane ka rukom rep tynrai kaba la leh da ki briew ba mynshwa ka pynjot ia ka mariang, hynrei kum ka shnong ngi pynlong ia katei ka ‘Krut Lyngkha’ ka dei tang ban pynsah jingkymaw, namar ia katei ka rukom rep tynrai kaba la leh da ki nongrep ba mynshwa, ym shem la pynlong shuh mynta la kumba 40 snem tam” la ong u Bah Albinus Timung.
U la ong ruh ba katei ka rukom rep tynrai la pynlong mynshwa ha manla ki jaka, ha kaba ki nongrep ki ju pynlong ia katei ka ‘Krut Lyngkha’ hashwa ba kin bet ia u symbai ha ki lyngkha kba jong ki, hynrei ha kine ki sngi bun na ki nongshong shnong ki la klet ia katei ka rukom rep tynrai jong ki mynbarim, la bynrap u Bah Albinus Timung.Kum ka shnong, ka Rongmasek ka dei ruh kawei na ki shnong kaba la ioh ka nam kum kata ka Meghalaya Green Mission (MGM), hynrei ban pynkhie im biang ia kum kitei ki jait rukom rep ka pynjot pat ia ka mariang, kumta ngi la rai ban pynlong ia katei ka ‘Krut Lyngkha’ tang kum ka dak ban pynsah jingkynmaw, bynrap u Bah Albinus Timung.