Sdang jingialang ka NEC, mynta yn kren U Modi

Shillong, 26 Jymmang:
Ka jingialang bah ne ka Plenary Meeting ba 65 jong ka North Eastern Council (NEC) ka la sdang mynta ka sngi ha nongbah Shillong ha kaba la wan iashim bynta da baroh ki Myntri Rangbah, ki Lat jong ki jylla ka Dong Mihngi. Ia ka jingialang la plie da u Chairman uba dei u DoNER, Dr. Jitendra Singh.
Ha kane ka jing ialang kaban neh ar sngi ban kut lashai ka sngi, yn wan ban ai jingkren da u Myntri Rangbahduh ka ri u Narendra Modi ha ka por 11 baje mynstep.
Ka jingialang mynta ka sngi ka la iakren ia ka Draft Annual Plan ka NEC na ka bynta u snem 2016-17.
U Dr. Jitendra Singh u la ong ba ka Shillong ka la dei ban don ka jaka dem ka liengsuin kaba biang ha kane ka nongbah bad ka sorkar pdeng kan ai ia ka jingkyrshan pisa ban pynheh ia ka jaka dem ha Umroi.
La iakren ruh ban pynlong ia ka dong mihngi kum ka ktem jong ki sboh mariang ha ka ri, nangta ban pynbha bad ban shna ia ki surok, ban kyntiew ia ka rep ka riang, ka kam jngohkai, ka jingiarap ia ki seng bad kiwei.
Hapoh ka skhim North Eastern Road Sector Development Scheme, la rai ban shna ia ki surok ban pyniasoh ia ki jylla ka dong mihngi khnang ban pynsted ia ka roi ka par ha ka thain.
Shwa ia kane, la ioh ruh ia ka jingpyni bad batai ia ki prokram bad ki tnad treikam ba iadei bad ka roi ka par ha kane ka thain.