“Ki la don teng 3 ngut mynta ngi pyn Zero ia ki” kob u Mukul ia ka BJP

Shillong, 25 Jymmang: Mynta ka sngi ha ka jingiakynduh bad ki nongthohkhubor ha kamra treikam jong u u Dr.Mukul Sangma u la bitar haba ki nongthoh khubor ki la kylli hato u sngew kumno ia ka lyer jong ka BJP kaba beh sted ha baroh ka ri bad kumjuh ha kane ka jylla ruh, “Haei kata ka lyer ka BJP iathuh phi ia nga, haei?” u la ong.
Ki nongthohkhubor ki la kdew ia ka jingjop donburom jong ka seng BJP ha Assam ha ka resol kaba dang shu mih ha kine ki khyndiat sngi ba la dep, u Dr.Mukul u la ong “Phi la peit katno ka BJP ka ioh nalade ha Assam bad katno ba ka ioh na ka seng Congress? Phi iohi ha kine ki 5 snem ba la dep ka la don ka thma pohing hapoh ka seng Congress ha Assam bad bun na ki nongialam ka seng Congress ki la phet seng, bun ki la shet kylla ia ka Party” u la ong.
U Dr.Mukul u la kdew ba dang shen ha ka resol elekshon ha ka jylla Kerela, West Bengal bad Tamilnadu ka BJP kam ioh eiei bad bun ki jaka ba dang khyrwit ka seng Congress, “Hynrei kum ha Assam ka Congress ka la synshar haduh 15 snem lynter bad bun ki jingkylla ka la wanrah lehse ki paidbah ki kwah mad kai shi samoi hato ka long kumno kane ka sorkar thymmai, kumba long ha ka ri ka UPA ka la synshar 10 snem lynter lehse ki paidbah ki kwah ban peit kai ia ia kane ka sorkar thymmai” ong biang u Dr.Mukul.