Na Delhi beit beit sha iing, leit kynjah U Dr Mukul

Shillong,24 Jymmang:
Tang ka lyer jong ka jingwan jong U Narendra Modi, myntri rangbahduh ka India, ka la biang ban pynsynjor ia ka shuki jong U Mukul Sangma myntri rangbah jong ka Jylla.
Katba ki bor pyniaid District, ki dang ker da ki siej ia ki surok bapher jong ka nongbah, ki dang sar ia ki niut ki nier kiba don ha ki rud surok bad ki dang kyrshut ruh ia ki kynroh, kiba don hajan ka Raj Bhavan, kumta hi ruh, la iohi, kumba ka jing ia sdang ban sar ia ki jaboh jabain, ki niut ki nier, ka la iaid ruh shakhmat ha ka sain pyrthei poh iing jong ka seng synshar ha ka Jylla, ka seng Congress.
Ki lad khubor, ki iathuh, ba wat la U President ka MPCC, U Bah DD Lapang, nangta ruh U Ma Vincent Pala, ki dang don mynta ka sngi ha Delhi, hynrei U Mukul Sangma, u bym shym la ia kynduh satia ia ka Sonia Gandhi, nongialam ba heh duh jong ka seng Congress, ula wan phai noh sha Shillong bad ynda poi ha Shillong, ula leit jar jar sha la iing, kaba don hajan Polo, bad um shym la leit rung satia ha Secreteriat.
Ki lad khubor kim pat lah ban pynthikna la u Dr.Mukul u ia kynduh myntri sorkar ne MLA Congress ne-em ha ingsah jong u, hynrei la ong ba haduh ka por 5 baje janmiet ruh la iohi ba kiba bun ki myntri sorkar khamtam kiba kham iajan paralok bad u ki dang don hapoh Secretariat. Ki lad khubor napoh Secretariat ki la iathuh ruh ba naduh ka por ba u myntri rangbah u bunkam ban ialap elekshon ia ka lok jong u haduh ka sngi ba la kut ka elekshon bad wat hadien ba la pynbna ia ka resol elekshon haduh mynta u myntri rangbah ka jylla um pat iuh kjat hapoh Secretariat kaba la jan dap shibnai eiei mynta. Haba wad jingtip ia kawei pat ka kynhun kaba dawa bujli nongialam bad kaba dawa ban khot jingialang CLP la ka don ne-em ka jingiakynduh jong ki mynta ka sngi, hynrei ki lad khubor ki la iathuh ba ka jingiakynduh jong ki kam long thikna naba ka don lyngkhot lyngkhot kaba ym lah ban ithuh.
Kiwei pat ki lad khubor, ki iathuh ba u myntri rangbah, u don jingthmu ban leit aiti noh ia ka shithi iehnoh kam jongu sha U Lat mynta hi ka sngi, hynrei, haba la wad khubor, na Raj Bhavan, la iathuh ba kat haduh ka por 9.30 mynta ka miet, U Sangma, um shym la kren satia, lane um shym la leit mih satia sha ka iing sah jong U Lat ka Jylla.