Pulom ka jingialang ki MLA Congress, na u lapbah, poi tang 3 ngut

Shillong, 23 Jymmang: Mynta ka miet ka la don ka jingialang ki MLA ka seng Congress ha ing sah jong u Salseng C Marak, myntri rangbah barim ka jylla ban pyrkhat halor ka kam nongialam ha ka sorkar Jylla, namar ba kiba bun ki MLA katei ka seng ki la pynpaw ia ka jingbym sngewtynnad shuh ia u myntri rangbah ka jylla u Dr.Mukul Sangma.
La ioh jingtip ba ha katei ka jingialang ki poi pynban tang 3 ngut ki MLA kata u bah Rowell Lyngdoh, symbud myntri rangbah, u bah Kennedy Khyriem,Parliamentary Secretary bad u Salseng C Marak; katba kiwei pat kiba bun ki la ai daw ba kim lah ban poi namar ka jingther palat u lapbah.
Ki tyllong khubor ki la iathuh ba la pynkynriah biang ia katei ka jingialang lashai ka sngi ka 24 tarik u jymmang, ha kaba ia ka jaka ym pat lah satia ban pynthikna bad ia katei ka jingpynkynriah noh lashai ka sngi ruh la ai jingmut da kiba bun ki MLA kynthup ki myntri sorkar ki bym lah ban poi mynta ka miet bad ha kane ka jingialang ka ban sa long ki ladkhubor ki la iathuh ba kitei ki MLA kiba pyrshah ia u Dr.Mukul napoh napoh ki lah ban shim noh ia ka rai rangbah hano kin pynkup ia ka kam nongialam jong katei ka seng bad ban shimti ia ka kammyntri rangbah bad u ban mih pli ha ka jaka u Dr.Mukul Sangma.
Watla ki MLA pyrshah Mukul kim shym la poi ha katei ka jingialang la ioh jingtip ba ki don ar lai kynhun na ki kiba pynlong jingialang lyngkhot lyngkhot tang para ia sngewthuh jingmut bad la sngewthuh ba katei ka jingialang lyngkhot jong ki ka long ban bat briew lypa na ka bynta ban ioh ia ka jingbun paid ban shimti ia ka kam nongialam ka ban yn pynsngew ha khmat kiba bun ki MLA ha ka jingialang ka ban long lashai ka sngi.
Hadien ba la paw pyrthei ki kam ia khih nongialam ka seng Congress lyngba ka jinghiar Delhi u bah D.D Lapang , u nongthohkhubor mynta ka sngi u la swait ha Secretariat ban wad jingtip ia ka iaid ka ieng ki MLA Congress bad ki myntri sorkar bad la iohi ba mynta ka sngi baroh ki shisngi ki don ki myntri sorkar kiba ia bunkam ban rung na kawei ka kamra sha kawei pat ha kaba nyngkong la iohi ba ka Deborah Marak bad u ma Sniawbhalang Dhar ki rung ha kamra u bah Prestone Tynsong bad hadien kumba katto katne por la iohi ba kitei ki myntri sorkar ki la kiew sa sha ka kamra u bah Rowell Lyngdoh bad dei hadien katto katne por ba ki la shong ha katei ka kamra u nongthohkhubor u la ioh jingtip ba ka la don ka jingpynbeit ban long jingialang ha ing u Salseng, hynrei katei ka jingialang ka la pulom noh namar ba kim lah ban ia poi lut.