“Sahdien ka Thaiñ Shatei Lam Mihngi, bym ryntih ka jingai bhah”

Shillong, 23 Jymmang: Uwei na ki dkhot ba kham rangbah jong ka National Green Tribunal (NGT) u Ranjan Chatter jee u la ong ba ka thaiñ shatei Lam mihngi ka sahdien namar ka jingbymryntih ka jingai bhah ia kane ka thaiñ. U Ranjan Chatterjee u la kren ia katei ka haba ai jingkren halor ka phang Clean and Green India-North East kaba la long ha St.Edmund’s College mynta ka sngi. “Ka Thain shatei Lam mihngi kam shym la ioh nong watla ka India ka wan ba lai ha ka ioh ka kot nalor ka Amerika bad ka China, ka ioh ka kot kam suh thied ha kane ka thaiñ” u la ong. U la kren ruh ia ka jingtroin ka rep ka riang bad ka jingsahdien ha ki rukom pynmih tiar bapher bapher.U la ong ba ka jingpynjaboh ia ka mariang ka duna ha kine ki thaiñ haba ia nujor bad kiwei pat ki jylla ka ri India hynrei u la ong ba kam don pat kata ka roi ka par ha kine ki thaiñ.
Haba kren halor ka ioh kam ioh jam u la ong ba ki riew shimet ki shem jingeh ban seng kam ha kane ka jylla bad katei ka dei kawei kaba ktah bha ia ka ioh ka kot jong kane ka thaiñ.U la ong ba dei tang ki kam ba seng ki riew shimet kiba lah ban ai kam bun ia ki samla ban ia ka sorkar “Naduh u snem 2015 haduh 2021 kan don ka jingpyntbit ia ki 17 lak ngut ki briew ban trei ha ki kam bapher bapher,na kitei tharai tang 2.6 lak ngut kiba lah ban ioh kam hangne hi ha North East bad kiwei pat ki hap ban mih shabar jong ka North East ban wad kam” u la ong.
“Ka la don ruh ka jingpyrshah ha kane ka jylla ia ka jingwan ka lynti rel naba ki tieng ia ki briew kiba nabar” ong u Ranjan haba kren shaphang ka ioh kam ioh jam ki samla. Haba kren pat shaphang ka Mariang ,u la kyntu ia ki samla pule ba kin ialeh ban pynneh pynsah bad ban pynjyrngam ia ka mariang da kaba sumar ia ki khlaw ki btap, “Peit ka Sohra ka jaka kaba jhieh tam ha ka pyrthei hynrei hangte ka jynjar ban thung jingthung, dei ban don ka buit stad kumno ban thung ia ki dieng ha katei ka thaiñ” u la ong.
U la kren ia ka jingma jong ka jingtih mawshun ha kaba u la kob ruh ba lada katei kakam kan dang iai bteng ha ki 30 ne 40 snem ban wan kane ka thaiñ kan sa kylla kum ka ri thor. Ula kdew ruh ka jingkhang tih dewiong thliew khnai ha kane ka jylla ha kaba u la ong ba donkam ban pyndonkam da kiwei pat ki buit stad ban tih dewiong ba kan ym ktah ia ka mariang.