Iap 3, ba tynrah ka thuk thuk ia ka Trok

Shillong, 16 Jymmang:
3 ngut ki samla ki la iap hadien ka jingjia aksiden kaba la jia ha ka miet sngi u Blei ha Mawkriah ha ka por 10 baje mynmiet. Kitei ki 3 ngut ki samla ki dang wanphai na Mawngap bad ki leit sha ka lynti ban wan sha Shillong bad ki shong baroh 3 ngut ha kawei ka thuk thuk.Hynrei haba la poi ha Mawkriah kynsan kynsan ka thuk thuk ba ki shong ka la leit ban tynrah ia kawei ka trok kaba pynieng ha surok. Ka thuk thuk ba kitei ki samla ki niah ka don ia u nombar KA 03 EA 1793 katba ka trok kaba pynieng ha Mawkriah pat ka don ia u nombar ML 05G 3909.
Ar ngut na ki, ki la iap hashen katba uwei pat u la iap shuwa ban poi ha Civil Hospital Shillong. Ki ar ngut kiba la iap hashen ki long u Borman Rapsang (25 snem karta) uba sah ha Mawklot, Upper Shillong uba niah artad ia ka thuk thuk katba uwei pat u dei u Rang khraw Bok Khongstiah (25snem karta) uba sah ha 4 mer shiteng katba u Donborlang Lyndem uba sah ha sawmer shiteng pat u la iap shuwa ban poi Hospital namarba ka jur palat ka jingmynsaw. U Additional SP (Traffic), Dr. SR Marak, u la ong ba ki pulit ki dang tohkit ia katei ka jingjia bad yn pynshitom ruh ia ka trok katkum ka aiñ naba kala pynieng ha ka lynti kaba khim bad kata ruh khlem da thang ding ban ai dak ia kiwei pat ki kali.