20 tylli ki trok kit Dewiong bat ki Pulit ka Ri Bhoi

Nongpoh, 16 Jymmang:
Haduh 20 tylli ki trok kit Dewiong, ki la shah bat noh ha ki Pulit ka Nongpoh Police Station, mynta ka sngi ha ka por 2 baje ei ei mynstep ha Ri Bhoi District, hadien ba la lap ba ki la pynkhein ia ki hukum jong ka NGT.
Kum ban shu pynkynmaw hangne, ka NGT dang hynnin ka sngi kata ha ka 15 tarik mynta u bnai, ka la dep ban pynmih ia ka hukum ban khang noh na ka bynta ban shalan ne tih ia u Dewiong ha baroh ka jylla Meghalaya.
Haba iadei bad kane na ka liang u Bah G.D Kharwanlang, SP ka Ri Bhoi Distict, u la iathuh ba ia kine ki trok kiba kit beain ia u Dewiong la bat noh da ki Pulit ka Nongpoh PS, hadien ba la lap ba ki la pynkhein ia ka hukum katkum ba la buh da ka NGT.
U la ong ruh ba ia kine ki trok kit Dewiong la bat ia ki ha ka por ba ki dang iaid ha ka surok bah NH-40 ha ki thain Nongpoh, hadien ba la bat ia kine ki trok, na ka liang jong ki Pulit ka Nongpoh Police Station, ki la register case pyrshah ia ki nongniah, ki trai kali bad ki trai Dewiong, bynrap u Bah G.D Kharwanlang.
Shuh shuh, nangne shakhmat ki Pulit kin iai long kiba peitngor halor ka jingdon jong ki katto katne ki trok kiba shalan beain ia u dewiong shabar ka jylla, da kaba pynkhein ia ka hukum jong ka NGT, la bynrap u heh Pulit ka Ri Bhoi.