Mynta kut ka ialap elekshon MP ha Tura

Shillong, 13 Jymmang:
Ka jingialap na ka bynta ka elekshon MP shiteng samoi sha ka Lok Sabha na Tura kan kut lashai ka sngi Saitjain shwa ban wan ka jingthep vote kaban long ha ka 16 tarik Jymmang, ka sngi Nyng kong. Ka jingialap elek shon ka dei ban kut 48 kynta shwa ban poi ka jingiathep vote katkum ka rul ka Election Commision ka India.
Ka jingiakhun ha kane ka kynti ka long kaba beit para marwei hapdeng u khun jong u PA Sangma u Conrad K Sangma bad ka lok jong u Myntri Rangbah u Mukul Sangma, ka Dikkanchi Shira na ka Congress.
Na ka liang ki bor pyniaid ia ka elekshon, ki la pynbiang ia ki bor pahara baroh ha ki jaka ba donkam khamtam ha ki jaka ba don jingma ba lah ban mih ka huri hura.
Ka Tura Parliamentary constituency kan long ha ka 16 tarik Jym mang ban wan, ha kaba ki 622189 ngut ki nongthep vote kin jied ia u nong mihkhmat sha Parliament.
Ka elekshon shiteng samoi na Tura la hap ban pynlong hadien ba la khlad kyndit noh u MP u Purno A Sangma na ka NPP ha u bnai ba la dep.
Ka sngi niew vote kan long ha ka 19 tarik Jymmang kaba dei artad ka sngi niew vote ia ka jingthep vote MLA elekshon ha Assam.
Na ka bynta ka Tura Parliamentary constituency kaba kynthup san tylli ki district ka don 315255 ngut ki nongthep shynrang bad 306934 ki shynrang ban jied ia u MP thymmai hadien lai snem ba la ioh ia ujuh u MP u PA Sangma.
Ki don 945 tylli ki jaka thep vote ha baroh kawei ka Garo Hills.
Ia ka jingthep vote yn pdiang beit da ka dur EPIC hynrei yn ailad ruh ia ki nongthep vote kiba don kyrteng ha ka electoral roll ban pyni da kiwei ki sakhi lada kim don ka EPIC. Ki don 410 tylli ki jaka thep ba don jingma bha bad 288 ki jaka ba don jingma malu mala. Ki don ruh sa 126 tylli ki jaka thep kiba lah ban mih jingiakynad hapdeng ki nongkyrshan jong ki kyrtong bad 409 tylli ki jaka thep vote kiban long jai jai.