Dawa bai bam ka KSU, na u myntri

Shillong, 13 Jymmang:
Ka Khasi Students’ Union (KSU) Delhi ha ryngkat ka jingdon lang u Bah Vincent H Pala, MP ka Shillong bad u Samla Kynpham Kharlyngdoh u President barim ka KSU Delhi bad u Assistant Education Secretary barim ka CEC ki la leit ia kynduh mynta ka sngi ka 13 tarik Jymmang, 2016 ia u Jual Oram u Myntri ba dei peit ia ka Tribal Affairs ka Sorkar pdeng ban pynsngew ha u ia ka jingeh ba ki samla pule ka Meghalaya ki ia kynduh namar ka jingbym pyllait ka Sorkar Kmie iaka baibam ki samla pule ne ka Scholarship naduh u snem 2014-2015 bad 2015-2016 .
Ha kane ka jingia kynduh ka KSU ka la kyrpad ia utei u myntri sorkar uba peit ia ka Affairs ba un pyllait noh kloi ia ka scholarship namar kane ka jingbym pyllait ia ka baibam ka la ktah shi katdei eh ia ki samla pule kiba kwah ban pule kham shajrong khamtam eh kito ki samla kiba wan na ki longing baduk kiba kwah ban pule kham shajrong bad kiba shaniah beit na kane ka baibam.
Ka KSU ka la ong ba u Jual Oram u la ong ba ia ka baibam ki samla pule la dep pyllait bad shen kin sa phah sha ka sorkar jylla. Bad ka jingpynslem baroh ka dei beit namar ki ophisar ba dei peit ia kane ki khlem shim khia hynrei mynta shen ki samla pule kin sa ioh noh ia katei ka baibam kaba dei hok ka jong ki.