Ngim don lad shuh sa tang ban pynkiew dor noh ia ka doh masi

Shillong, 11 Jymmang:
Ka Seng jong ki nongdie doh masi ka Khasi Jaintia Butchers Welfare Association (KJWA) ka la pynpaw ia ka jingsngew bynniaw ia ka jingleh bym suid niew ka sorkar ban tehlakam ia ka jingkhaii masi beain sha Bangladesh kaba la ktah jur ia ka die ka thied jongki ha kane ka jylla.
Dang ha kane ka sngi Hatmajai, ka KJBWA ka la iakynduh ia u Symbud Myntri Rangbah ka jylla ba peit ia ka kam ain u Bah Rowel Lyngdoh ban pynkynmaw ia ka jingdawa jongki ba ka sorkar ka dei ban thaw ain noh ia ka kam khaii masi ha kane ka jylla.
“Ngim don lad shuh da kumwei pat ban iakhih hynrei ka dei beit tang ban pynkiew dor noh ia ka doh masi lada ka sorkar kam lah ban tehlakam ia ka jingkhaii masi”, la ong u Vice President ka KJBWA u Bah Generous Warlarpih haba iakren bad u Rupang ha kane ka sngi Hatmajai.
Katkum ka jingong u Bah Warlarpih, ki pulit ka jylla kim leh eiei ban kurup ia ki masi bad ban kem ia kiba khaii beain ia ki hynrei kumba ka paw, ka dei beit ka jingpyrshang tyngeh jong ki shipai BSF.
“Ka sorkar man ba iakynduh  ka ong, to shi to hynrei kam pat leh haduh kine ki sngi”, la ong u Bah Warlarpih.
U la ong ba ka jingiaid ki masi beain sha Bangladesh ka jur bha man ka sngi hynrei lyngngoh ba ki pulit kim leh eiei ha kine ki sngi. “Ma ngi kiba im da kane ka kam, ngim lah shan shuh bad ka lad ka long beit tang ban pynkiew noh  ia ka dor doh masi”, la bynrap u Vice President ka KJBWA.