Yn ym leit ialap elekshon U MaVincent, kong Wansuk ne ki heh Congress na Delhi

Shillong, 10 Jymmang: Katba ki heh BJP ki nang tuid shaid shi shaid sha ri Lum Garo ban leit ialap elekshon na bynta u Conrad K Sangma kyrtong ka seng NPP; ym shym la iohi pat ia ki heh Congress ba kin patiaw eiei ia ka kyrtong jong ka, ka Dikanchi D Shira lait noh tang katto katne ngut ki heh na kane ka jylla Meghalaya ha kaba la ioh jingtip ruh ba yn ym don ki heh Congress na Delhi ne ki MP na kane ka jylla ki ban leit sha ri Lum Garo na bynta ka Dikanchi.
Haba ia kren bad U Rupang ki lad khubor kiba jan eh bad ka seng, ki la iathuh ba haduh mynta ka sngi ym pat shym la don ki heh Congress kiba la leit ban ialap elekshon ia ka Dikanchi sha ri Lum Garo, lait noh tang katto katne ngut ki myntri sorkar kynthup ia u bah D.D Lapang, kong Ampareen Lyngdoh bad ka Deborah Marak.
Sa tang 4 sngi dang don por ia ki kyrtong MP ha ri Lum Garo ba kin leit ialap paidbah, la kylli na ki nongialam Congress hato ha katei ka 4 sngi ba dang sah la buh prokram ne-em ia ki heh Congress na Delhi ba kin wan ialap elekshon sha ri Lum Garo hynrei la jubab ba ym shym la don satia ka jingpynbeit prokram ia uno uno u heh Congress na Delhi ban wan sha ri Lum Garo.
La kylli biang hato ka don ne em ka jingbuh prokram pat ia u MP Lok Sabha ka Shillong Konstitwensi u ma Vincent Pala lane ia ka MP Rajya Sabha ka kong Wansuk Syiem, “Em kam don ka prokram ba la buh ia ki, ngim thikna shuh ba kin dang wan” ong uwei na ki nongialam Congress haba ia kren bad u Rupang. Katkum ka jingiathuh utei u nongialam Congress u la iathuh ba kiba la wan ban ialap elekshon ia ka Dikanchi sha ri Lum Garo haduh mynta ki long u bah Lapang,kong Ampareen, kong Roshan, bad ka Deborah Marak. Haduh mynta la ong ba dei tang u Dr.Mukul Sangma myntri rangbah ka jylla uba la durut tyngeh miet la bad sngi ban tur sha manla ki kyndong kynshrot ka ri Lum Garo ban ialap elekshon na bynta ka tnga jong u ka Dikanchi.
Haba phai pat sha ka seng NPP ki nongialam jong ka ki la iathuh ba ha ki prokram ba la dep ruh ki la don ki heh jong kiwei pat ki seng saiñpyrthei kiba kyrshan ia u kyrtong jong ka kiba la ai jingkren paidbah ha ka jingiaid ialap elekshon, bad nalor kata ruh ha kine ki saw sngi ba dang sah ki la iathuh ba ki la pynbeit kyrpang ia ka prokram kaba heh ha sor Tura ha kaba ha katei ka jingialang kin wan ai jingkren ki heh ka seng BJP na Delhi kaba kynthup ia ki myntri sorkar pdeng kum u Jual Oram,u Kiren Rijiju, Sonowal, u Nalin Kohli bad kiwei pat.