Dawa ki 39 Unit ban pynwai noh ia ka Block Congress ha Nongstoiñ

Shillong, 10 Jymmang: Ki 39 tylli ki Primary Unit ka seng Congress ha Nongstoiñ ki la dawa na u President ka MPCC u bah D.D Lapang ba un pynwai noh ia ka Nongstoiñ Block Congress Committee ha Nongstoiñ. Ha ka kyrwoh khubor ba la soi da u Bah J. Pariong, Bah S. Dkhar bad Bah B. Syiemlieh kiba la kam ba ki dei ki briew ka seng Congress ki la pynpaw ka jingsngewsih halor ka jingbym biang ka rukom treikam katei ka seng ha nongstoiñ bad ki la kynnoh ba katei ka dei na ka daw ka jingai bor tang ha uwei u briew uba ki Primary Unit kim ithuh satia.
Ha ka jingthoh kaba la phah sha u bah Lapang kitei ki briew ki la ong “Ka jingdonkam ban pynwai noh ia ka NBCC ka dei namar baroh ki primary unit ki la ïap noh tang hadien ka jingthung ia u Bah Gabriel Wahlang ban pyniaid ia ka BCC bad ka jingbym kheiñ snep ia u bun balang khamtam ha ka por ilekshon shiteng samoi”. Kine ki rangbah ki la pynpaw ruh ha u bah Lapang ba ki kwah ia ka jubab jong u la un dang bteng bad kane ka BCC kaba mynta ne un pynthymmai noh da kiwei khamtam ha ka jingbym seisoh ha ka ilekshon shiteng samoi. “Lada ki nongialam ka MPCC ki kwah ba ka Congress kan ioh mynsiem ioh bor ha u 2018, ka donkam ban pynwai shuwa ïa ka BCC ba mynta bad ban ioh da kiwei ki nongkitkam kiba lah ban sngewthuhlang ïa ka sur jong ki primary unit,” ong ka kyrwoh u Bah J. Pariong, Bah S. Dkhar bad Bah B. Syiemlieh. Katei ka kyrwoh khubor ka la ong ruh ba lada jia ba ka kam wan ka jingkylla lada wan mano mano ruh ha ka elekshon 2018 ka Congress kan ym jop satia.