Buh mawnongrim ia ka RSETIs

Shillong, 10 Jymmang:
Ka Punjab National Bank kaba peit ia ka jingkiew jong ki shnong kyndong ha ka jylla Meghalaya kala pyniar ia ka rukom treikam jong ka da kaba buh ia u Maw nongrim na ka bynta ban tei ia ka Rural Self Employment Training Institutes (RSETIs) ha East Khasi Hills District myn ha ka 9 tarik, jymmang 2016. La thaw ia ka RSETIs katkum ki jingbthah jong ka Ministry of Rural Development, jong ka Sorkar India ha kaba ia ka jaka, ka sorkar jylla kan ai. Ka Bank kala shim ia kane ka jingkit khlieh kum ka dak ban pynkhlain shuh shuh ia ka jingtreikam jong ka ha ki nong kyndong bad ban pynmih ruh shibun ki briew ki ban seng ia ki kam la jong na ki jaka kiba dang sahdien kiba don ha ka jylla Meghalaya kaba dei kaweina ki thain shatei lam mihngi iathuh ki tyllong khubor.
Ha kane ka sngi ia u mawnongrim la wan ban buh da ka Myntri ki kam pohiing ka Kong Roshan Warjri bad ka Usha Ananthasubramanian, kaba dei ka Managing Director bad CEO, jong ka Punjab National Bank.
Haba ai jingkren ha kane ka sngi, ka Managing Director jong ka PNB ka la ong ba ka jingbuh ia ka RSETIs ha ki thain shatei lam mihngi ka long kum shi bynta ban pynroi ia ka skill development ha ki jaka kyndong bad ban wanrah ruh ia ki lad ki lynti ki ban kyntiew ia ki shnong kyndong da ka jingkyrshan jong ka PNB Centenary Rural Development Trust (PNBCRDT) ia kaba la thaw ha u snem 1993. Kala ong shuh shuh ruh ba ka jingdon jong ki 54 tylli ki RSETIs ha ki 12 tylli ki jylla ia kaba la sponsor da ka Bank kala long ka jingkyrkhu kaba khraw namar haduh kumba 1.6 lakh ngut ki kandidate kila lah ban ioh jinghikai na kane, ha kaba 1.11 lakh ngut ki dei tang ki kynthei, 58 percent mynta kila lah ban ieng ha la ki jong ki kjat, ka la bynrap.
Ka bank ha kajuh ka por kum ka jingpynshlur ia ki briew ba kin seng ia ki kam la jong, ka ai ruh ia ka ram lyngba ka Mudra Loan Scheme.
Kala pyntip ruh sha ki paitbah ba haba kut jong ka jing ai jinghikai kaba hap ha ka Mahila Kaushal Vikas Yojana, kumba 1000 ngut ki kynthei kin ioh ei ia ki tiar ki tar kiba iadei bad ka jinghikai kaba shongdor kumba 3000 tyngka marwei. Kala pyntip ruh ba ka PNB kan pynrung kumba 100 ngut ki khynnah kynthei na ka bynta ba kin ioh ia ka jingiarap pisa kumba 3,500/- tyngka man u bnai na ka bynta ka jingpule jong ki haduh ba kin da pyndep ia ka klas xii. Hadien ba kila pyndep ia ka klas xii pat kila ban shim ia ka education loan na ka bynta ka jingpule ba kham sha jrong ka la bynrap.
Ka myntri ki kam pohiing haba kren ha kane ka sngi kala pynpaw ia ka jingsngewhun kaba khraw ia kaba la wanrah da ka PNB bad kala ai khublei ruh ia kane ka bank kaba la noh synniang shikat dei eh sha ki jaka kyndojng ha kiba bun ki jaka ha ka ri. Ka la ong ruh ba ka jingdon jong ka RSETIs kan long ka jingkyrkhu ia ki khun samla na ka bynta ban pynshlur ia ki ban ba kin seng ia ki kam lajong.