Wanrah burom u samla Barister, ia ka GBHSS Jowai

Jowai, 9 Jymmang:
U samla Berister Swer u samla u la wanrah nam bad burom ia ka Government Boys Higher Secondary School (GBHSS) bad kumjuh ia ka iing ka sem ha kaba u la ioh ia ka kyrdan ba-ar napdeng ki 10 ngut (top ten) ha ka result MBoSE +2 Science kaba la pynbna mynta ka sngi.
U Samla Berister Swer ula duh ia ka kyrdan ba nyngkong napdeng ki 10 tang da 7 mark. U dei u khun Missidion Swer bad u ma Chemphang Dhar uba la khlad noh dang shisnem eiei mynta. U dei uba pule ha ka shnong Kyndongtuber ha shwa ban un wan ban pule ha katei ka skul naduh Class VIII.
Utei u samla u la wanrah burom ruh ia katei ka skul ha ka exam SSLC ha kaba u la wan ha ka kyrdan kaba 15 naduh ki 20 ngut (top 20) ha ka por ba u ialeh ia ka Exam Matric.
Utei u samla u la ioh kamai marks ha ka English – 75,  Mathematics – 98, Physics  – 95, Chemistry – 97, Biology – 92 bad ha ka sobject Khasi 87 marks. Baroh u la ioh kamai haduh 457 mark.
Ka Government Boys Higher Secondary School ka la ioh sei haduh 20 ngut ki first Division, 10 ngut ki second Division. Ki don 33 ngut kiba ialeh ia ka Exam ha une u snem na katei ka skul.