Buh teng shwa ka KHADC ba pan jingmynjur na u Lat 5 tarik Naitung ka dorbar kyrpang ban phiah constituency

Shillong, 25 Jylliew:
Ka dorbar jong ka KHADC hynne kam shym la lah ban pas ia ka Bill ka Constitution of District Council Amendment Rule ban phiah bad pynmih constituency thymmai wat hadien ba la wanrah ia kane ka Bill ha ka sngi sdang ka dorbar.
U CEM Bah Pyn shngainlang Syiem haba wanrah ban pynsangeh ban pas ia kane ka Bill, u la ong ba kane ka Bill ka donkam ban ioh shwa ia ka jingkubur na u Lat ka jylla shwa ban pass bad ka don ruh ka jingpynbeit ia ka jingbakla hangne hangtai bad u la ai jingmut ia ka dorbar ban ieh shwa bad yn pas hadien ba la dep iakynduh shwa ia u Lat.
Ia kane ka jingai jingmut u CEM la pdiang da ka iing bad na ka liang u chairman ka KHADC u la pynbna ba ka dorbar kyrpang ban iakren ia kane ka Bill, kan long ha ka 5 tarik Naitung, 2013.
“Ngi la buhteng shwa ban iakren ia kane ka Bill namar ba ngi donkam ban pynbeit ia ki jingbakla. Ngi donkam ia ka jingmynjur u Lat”
Kane ka jingpan jingmynjur na u Lat ka dei ka sien ba nyngkong ba ka Council kan shim namar ba ha kip or mynshwa kam ju kham jia koit kum kane.
“Hadien ba la pas ia ka Bill, ngin hap phah biang sha u Lat ban ioh ia ka jingmynjur, la ong u CEM.
Ha kane ka Bill la thmu ban pynduh ia ka Laitkroh bad ban pynmih thymmai da ka Umsning constituency da kaba bud katkum ka MLA constituency.
Kham mynshwa u MDC ka Laitkroh u Bah CS Sohtun u la pyrshah jur ia ka jingthmu ban pynduh ia kane ka constityency khlem da iaid katkum ki kyndon bad ka long ruh pyrshah ia ka jingsngew bad ka hok jong ki paidbah ka Laitkroh.