Leit bar pathar ha phyllaw ka FCI, dawa painkhana ka FKJGP na u DC

Shillong, 04 Jymmang:
Ka Federation of Khasi Jaintia Garo People (FKJGP), Mawlai circle mynta ka sngi ka la iakynduh ia u Deputy Commissioner ka East Khasi Hills Bah Peter S Dkhar ban dawa ba u dei ban shim khia ban hukum ban shna painkhana noh ha phyllaw ka FCI namar ba ka long kaba isait met bad khlem akor nalor ka jingsma na ka jingleit bar pathar ki briew khamtam ki nongniah trok ba wan buh ne kit mar na katei ka jaka.
Ka kynhun jong ka FKJGP Mawlai la ialam da u Bah Marbud Dkhar u president ki la iathuh ba u DC ba ki trok kiba ieng da u lain ki la wanrah ia ka jingpynwit ia ka leit ka wan jong ki paidbah bad ki la pynjaboh da kaba leit bar kulmar nalor ba ki bret ia ki jaboh jabain katba shaba lap ba shem.
Ka FKJGP ka la ong ba nalor ba ki bret pathar ia ki tiar ki tar, ki nongniah trok ki la pynjaboh ia katei ka jaka namar ba ki bamja bad bret pat ia ki jaboh ha katei ka jaka.
Na ka liang u DC u la kular ba un phah ia ki ophisar ban leit peit ia katei ka jaka lem bad ki nongshong shnong bad ka seng ban shna ia ki painkhana.
Ha kawei ka liang, ka seng ka la ong ba bun ki paidbah ka Mawlai kim ioh satia ia u mar reshon watla ka kudam FCI ka shlei smam da u khaw.
Halor kane, u DC, u la ong ba ka dei namar ba ka sorkar ka dang pyntreikam ia ka National Food Security Scheme hynrei u la kular ba un khot ia ka jingialang bad ki nongdielang ban iakren ia kane.
U  DC u la iathuh ba ia u khaw yn sa pynlait ha une u bnai.