Ngiah shoin, ba kyllain ka rukom pan jingiarap eriong

Shillong, 03 Jymmang:
Ki paidbah ka thain Riwar Mihngi ka Pynursla ki la sngew ngiah hi shoin ia ka rukom bthah ka sorkar ban pyntip ia ka jingjulor na ka jingjynrat ka bor mariang ia ki jing thung jingtep, ki ing ki sem.
U nongthoh khu bor uba la iakren bun ki paidbah ba shah lynshop eriong, phria ha kine ki sngi na thain Mawlam, Mawlyndun, Lumwahniai bad kiwei ki shnong, ki la sngew ngiah ia ka rukom ba ka sorkar ka la bthah ia ki.
“Ngi hap leit ai FIR sha ki pulit, na ki pulit kin soi bad sa leit sha Block bad na Block kin sap hah ia u gramsevak ba un leit peit ia ki jingjulor bad un sa kit sha sorkar”, la ong ki katto katne ki riew rangbah haba iakren bad u nongthoh khubor mynta ka sngi.
Tang haba leit haba wan ban pyntip ia ki jingjulor ka mariang, ka jinglut ka bym kai shuh namar ka jingjrong palat ka lynti.
Kiba bun ki sngew ba kane ka jingleh ka sorkar ka long tang ka jingpynlut kai ia ka por namar ba u pulit ruh u shu thoh repot na ophis bad um leit satia ban jurip.
“Ngim tip shuh kumno ka sorkar kan ai jingiarap, namar kumba ju lap ha ki snem ba la dep, ka jingjulor kaba jur katba ka jingiarap pat tang kum ka bai shun”, la ong u Bah H Khongthaw na Mawlyndun.
Ki la iathuh ruh ba don ki shnong kiba shah pynjulor ha ka mariang kim shym la iohi satia ba ki gramsevak na blok kin wan jurip ia ki jingjulor ka mariang hynrei la shu leit ai jingtip hi ki briew na ki shnong.