Bitar ka KSU, ba thung maw pud ha jaka shimet ha Bye Pass

Shillong,25 Jylliew:
Ka KSU Mawryng kneng Circle ka la phah da ka jingthoh sha u Project Manager
GR Infra Project Pvt.Ltd,Shillong ka Kompeni ba pyntrei ia ka Bye -Pass ha kaba ka la bthah ia katei ka kompeni ban weng noh ia u Maw Pud ba ka la thung ha ka jaka jong ki riew shimet ha Thangshalai bad ha Mawryngkneng da kaba kdew ba ka jaka ba la thung ia u Mawpud ka dei ka bym hap shuh ha ka jingpyntrei ia ka Shillong-Bye Pass bad ka bym kynthup ha ka jingsiew ka sorkar ia katei ka jaka. Ha ka shithi ba ka la phah na duh ka 19 tarik mynta u bnai ka KSU ka ai por hapoh ka ar- taiew ia katei ka kompeni ban weng noh ia utei u Mawpud bad lada kam lah ban leh kumta ka seng bad ki trai jaka kin leit weng da lade hi.
Halor ka shithi ba la ioh na ka KSU katei ka kompeni ka la ai ka jubab jong ka ba ka jaka ba ka la thung ia utei u Mawpud ka dei katkum ka rekod ba ka ioh pdiang na ka N.H.A.I bad D.C jong ka East Khasi Hills, hynrei ka la ong pat ba la bthah ia ka ban pynlong biang ia ka survey ban peit bha sa shisien biang bad lada lap ba ka don kano kano ka jingbakla ka kompeni ka kloi ban ia pynbeit bad ban rah noh ia utei u Mawpud.
Katei ka kompeni ka la iathuh ruh ba ka la pynlong ka jingialang bad u ADC ka East Khasi Hills mynta ka sngi ha kaba u la kular ban ia leit ryngkat ha katei ka jingleit jurip ia katei ka jaka ha ryngkat ka jingiadonlang jong ki heh ka PWD lane NHAI ha ka taiew ba kut une u bnai lane ha ka taiew ba nyngkong u bnai ban wan.