Weng ki nongujor ia ka jingpyrshah khang Wine Store

Shillong, 2 Jymmang:
Ka jingkhang ia kiba bun ki Wine Store ha ka jylla kan dang iai bteng hadien ba ka East Khasi Hills Wine Dealers Association, Ri-Bhoi Wine Dealers Association bad uwei pat u riew shimet ba la tip kyrteng kum u Hamsaia Pariat ki la weng noh ia ka jingkyrpad jong ki kaba ki la phah sha ka kashari.
Mynta ka sngi ka Meghalaya High Court ka la shah ia kitei ki nongujor ba kin weng noh bad la weng noh artad ia katei ka jingkyrpad jong ki. Kitei ki nongujor ki la pan bor na ka Court ba kan ai jingbit ba kin weng noh ia ka jingujor jong ki da ka jingthmu ba kin buh da ka jingujor kaba thymmai lane ba kin dang pyrkhat shuwa ban peit katkumki aiñ.
Lah ban kdew ba ka sorkar jylla ka la wanrah ia ka jingpynbeit thymmai ia ka Rule 183 jong ka Meghalaya Excise Rules namarba ka Rules kaba rim kam kdew shai ia ka jaka ba dei ban pynieng ia ki Wine Store. Katei ka ain thymmai ka sorkar jylla kaba la pynbna paidbah ha ka 23 tarik u nailur, 2015 da u Commissioner bad Secretary, Excise, bah J. Lyngdoh, ka la hukum ba baroh ki jaka die kyiad kiba hap hapoh 200 mitar na ka jaka mane blei,jaka pule bad ki jaka sumar ki dei ban khangnoh.
Ha katei ka jingpynbna la hukum ba dei ban pyntreikam ia katei ka aiñ hapoh ka hynriew bnai bad la pynjari ruh ba yn ym shah ban pynieng Wine Store ha ka jaka kaba hapoh ka 50 mitar ka jingjngai na ki surok bah ka nongbah Shillong bad 100 mitar sha kiwei pat ki jaka. Lah ruh ban kdew ba tang mar ia pyntreikam ia katei ka aiñ ki la don haduh kumba 314 tylli ki Wine Store kiba la shah ktah na ki 600 tylli kiba don ha baroh kawei ka jylla.
Lah ban pynkynmaw ba ka East Khasi Hills Wine Dealers Association, Ri Bhoi Wine Dealers’ Association bad u bah Hamsia Pariat ki la ujor ia katei ka hukum ka sorkar bad ki la ujor sha ka High Court ba kan tuklar ia katei ka kam. Hynrei mynta ka sngi la weng noh ia katei ka jingujor jong ki.