Kurup kyiad beain ha Nongpoh

Nongpoh, 02 Jymmang:
Da ka jingthmu ban teh pyrkhing halor ka jingjyllei ki dukan kyiad kiba die beain ha Sor Nongpoh, ha ka miet sngi U Blei ki dkhot ka HNYF, Northern Region, ki la ioh ban kurup ia ka kyiad phareng kaba la kot sha ki spah liter na ki ar jaka ha ka Nongpoh.
Ki dkhot jong ka HNYF, Northern Region, hapoh ka jingialam jong u president Bah Marcus Marten bad u General Secretary Bah Adelbert Nongrum lem bad ki dkhot jong ka seng, ki la ioh ban kurup ia katei ka kyiad na kawei ka dukan kyiad beain kaba la long trai da u Bah Coming Kharshandi bad na kawei Auto Rickshaw kaba don ia u no. ML 10A 3658, kaba kit ia ki kyiad jong u Bah Donbok Jyrwa bad u Pankaj Dey katba ki dang kit ia katei ka kyiad na Byrnihat ban wandie sha Nongpoh.
Hadien ka jingioh ban kurup ia katei ka kyiad beain kaba la kot sha ka spah liter, na ka liang ki nongialam ka HNYF, Northern Region, ki la leit ban aiti noh ia katei ka kyiad sha ki ka Nongpoh Police station, khnang ba kin ioh ban leh ia kaba donkam baroh.
Ha kaba iadei bad kane ka kyiad ba la wan aiti da ki nongialam ka HNYF, na ka liang ki Pulit ka Nongpoh PS, ki la ujor ruh da ka ejehar pyrshah ia kitei kiba donkti ha katei ka jingdie beain ia ka kyiad bad ki la ong ruh ba kin rejister da ka Case ba katkum ki kyndon jong ka Meghalaya Excise Act bad ia katei ka kyiad yn aiti noh sha ka tnat Excise, kaba dei ka tnat sorkar kaba peit halor jong ki kyiad beain.
Haba kren sha ki nongthoh khubor, u Bah Marcus Marten, u la ong ba ka seng ka dap da ka jingsngewkhia halor ka jingjyllei ki dukan kyiad beain ha Sor Nongpoh, kumta na ka liang jong ka seng nangne shakhmat kan iai peitngor, khnang ban tehlakam ia ki dukan kyiad bad kumjuh ruh ia ki nongdie kyiad beain, namar ka jingdon jong ki dukan kyiad kiba die beain ka pynjot ruh ia kiba bun ngut ki khun samla.