Weng sa ia ka Assam Rifle bad Air Force, ong ki Sengbhalang

Shillong, 1 Jymmang:
Hadien ba la mih ka rai ban rah noh ia ka ktem bah ka ITBP na Shillong sha Arunachal Pradesh la mih ruh ka jingdawa ban weng noh ia ka ktem shipai jong ka Assam Rifle bad ka Air Force nangne na nongbah Shillong.
U Chairman ka NESO u bah Samuel Jyrwa u la ong ba na ka por sha ka por ki seng bhalang ki la dawa na ka sorkar pdeng ba kan weng noh ia ki ktem shipai na nongbah Shillong bad dei ban pynphai biang ia ki jaka ba ki la kurup sha ki trai jaka kiba dei hok kiba long trai ia kitei ki jaka.
U la ong ruh ba ki don bunbah ki kur kiba longtrai ia ki jaka ba shah kurup ha ki shipai kiba dang ia khun mukotduma haduh mynta ruh ban ioh biang ia ka hok jong ki. Katkum ka jingong utei u President barim ka KSU u la ong ba kumba 35% ki jaka hangne ha nongbah Shillong ki dei ki jaka ba la thaw ktem ki shipai. U la ong ba lada yn pynphai biang ia kitei ki jaka sha ki trai kan iarap na ka nongbah Shillong ban lait na ki jingkhapngiah. Ha ka juh ka por ha ka jingiakren bad ki lad khubor u MLA ka UDP u bah Paul Lyngdoh u la ong ba ka nongbah Shillong ka dei ka nongbah jong ka thain shatei Lam mihngi baroh kawei hynrei hadien ka jingwan thaw ktem ki shipai ka la kylla lut nadong shadong.