Leit jngoh ka KSU ia ki Khappud

Khanduli,25 Jylliew:
Ka KSU ka la iaid kylleng ki jaka kiba ki Khasi ki sah na ka bynta ban iasaid na ka bynta jong ki bad khamtam ban wanrah ia ka jingialong kawei bad pyniatylli ia ka ri u Hynniewtrep. Ha ka 21 tarik mynta u bnai ka KSU Seng Kmie hapoh ka jingialam u samla Frederick Kharmawphlang( Vice President) ryngkat u Samla Streamly S. Ñiangti, u General Scretary Ka KSU Jaintia Hills District bad ki nongialam ka KSU Nartiang Circle ki la leit pynlong ka jingialang paitbah sha ka shnong Khanduli hapoh WJHD na ka bynta ban sngap bad ia phylliew jingmut bad ki nongialam shnong kiba don ha kito ki thain. La pyniaid ia kane ka jingialang da u samla Ohibait Dkhar(Vice – President KSUJHDU).
Ha katei ka jingialang la ioh shwa ia ka jingkren na ki Rangbah shnong ki thain khappud ka khanduli na ka bynta ban pynpaw ia baroh ki jingeh kiba ki ia kynduh ha baroh shikatta ha khmat ki nongialam ka seng naduh ka jingshahthombor ia ka hok jong ki, ka jingbymbiang u surok, ki skul bad kiwei ki lad pynroi. U Secretary shnong jong ka Mukoiram, u la pynpaw ba ka shnong Mukoiram ka dang hap shapoh Meghalaya tang ha ka Kyrteng namar la leh klet ia kane ka thain nadong shadong wat ia ki skhim pynroi ruh ym juh ioh satia. “Ngim juh ioh ei ei na ka sorkar Meghalaya wat tang ia ka bording ruh hynrei ngi ioh tang ki Dieng Post kiba la pynieng jubor da ka Assam”, la pynpaw shuh shuh utei u rangbah.
U Samla Frederick Kharmawphlang pat haba ai jingkren u la pynpaw ba na ka liang ka seng KSU ka la iaid kylleng ki shnong kiba don ha ki jaka kiba don ha khappud bad ka Assam kata naduh Raid Nongtung(ne Block 2), Mowluber, Mukroh, Saba( ha Pangam Raliang ne Block 1), bad kiwei pat ki shnong ban sngew da la ki jong ki shkor ia ki jingeh bad jingthrang, jingangnud jong ki paitbah ba ki paid u Hynniewtrep ki ia Kynduh. Ka seng kan sa ia leit shen ban buh ia ka dorkhas hakhmat ka sorkar na ka bynta ban pynurlong ia kajingkwah ki paitbah kumjuh ruh ban pynbiang ia u pud u sam.