Sahkut ka kyrteng U Bah Donkupar, ha DCA

Shillong, 29 Iaiong:
U MDC ka UDP  na Umsning u Bah Donkupar Sumer u la ong ba ka jingpynslem ka sorkar ban pdiang ia ka kyrteng jong u ba la phah da u Chief Executive Member (CEM) ban long Executive member (EM), ka dei tang ka jingleh kyllain politik ka sorkar jylla.
Haduh mynta ka kyrteng jong u Bah Donkupar Sumer ka dang sahkut ha ka phai (file) ka tnad District Council Affairs (DCA) kaba khlem phah sha u Lat ka jylla la bun bnai bha bad namar kane, um pat lah ban shong shuki EM.
“Ka la paw shai ba ka dei ka jingleh politik ka sorkar jylla. Mynshwa ha ka por ba synshar ka  All Regional Party Alliance (ARPA) ka la synshar ha KHADC, tang shi taiew la pdiang wut wut ia ki kyrteng ba la phah da ka KHADC ban long EM, mynta pat da ki bnai ruh khlem leh eiei”, la ong u Bah Donkupar Sumer haba iakren ha kane ka sngi Thohdieng.
U Bah Donkupar u la ong ba u myntri ka tnad DCA u Bah HDR Lyngdoh u tip bha ia kane bad u dei uba biang ban ai ia ka jubab halor kane ka jingpynslem ban pdiang ia ka kyrteng jongu ba la phah la slem da u CEM ka KHADC Bah Pynshngain N Syiem.
U la ong ba ha ka jingshisha katkum ka AD Rules, ka sorkar kam don bynta eiei ban tuklar ia ka jingthung EM hynrei dei u Lat ka jylla uba iadei beit bad ka District Council. “Ki district council ki hap ha u Lat ka jylla, ym ha ka sorkar jylla”, la ong u Bah Donkupar.     U la ong ba u shaniah ha ka jingpyniaid jong u CEM ka KHADC halor kane ka kam.
Hynrei la suba ba  ka jingpynslem ka sorkar ban pdiang ia ka kyrteng ba la phah da u CEM ia ka kyrteng jong u MDC ka UDP ban shimti ia ka kam EM, dei namar ba ka la don ka jingiapher bad iapyni bor hapdeng u CEM bah Pynshngain bad u Myntri Rangbah u Mukul Sangma.