30 kompeni pan pulit ha Tura

Shillong, 29 Iaiong:
Ka sorkar jylla ka la pan 30 kompeni ki pulit Central Armed Police Forces (CAPF) na ka sorkar pdeng na ka bynta ban pyndonkam ban pahara ha kane elekshon MP shiteng samoi na Tura kaban long ha ka 16 tarik Jymmang ban wan.
U Chief Election Officer (CEO) ka jylla u Bah Frederick Kharkongor haba pyntip ia kane, u la iathuh ba ka sorkar jylla ka donkam sa 30 kompeni nalor ki pulit ba la don lypa ban pahara ia ka elekshon shiteng samoi ban pynthikna ban long kaba iaid beit iaid ryntih bad kaba suk ba sain.
“Ngim pat ioh jubab na ka sorkar pdeng haduh mynta, hynrei ngi kyrmen ba kan phah ia ki bor pahara kumba ngi la dep pan”, la ong u Bah Kharkongor haba iakren mynta ka sngi.
Ka elekshon MP shiteng samoi na Tura la hap ban pynlong hadien ba u MP ka Tura u PA Sangma na ka NPP u la khlad noh ha ka 4 tarik Iaiong.
“Hadien ba la iashong jingialang bad ki SP jong ki district bad ki heh sorkar, ki pulit ki la ai jingmut ba ka jingdonkam bor pahara ban pyndonkam na ka bynta ka elekshon ban long ha ka 16 tarik Jymmang ha baroh kawei ka Garo Hills”, la ong u Bah Kharkongor.
Ki bor synshar district bad ki pulit ki don hapdeng ka jingiasam khubor bad ki bor na Assam na ka bynta ban pynthikna ba ka suk ka sain kan long kaba iaid beit.
Ki don 945 tylli ki jaka thep vote ha baroh san tylli ki district ha Garo Hills kaba kynthup ia ka 24 tylli ki MLA.
U Bah Kharkongor u la ong ban pynthikna ia ka jingwan thikna jong ki nongthep vote, la buh ban ai khusnam ia kumba 4,725 ngut ki nongthep vote.
Ha kane ka elekshon shiteng samoi ka jingiakhun kan long para marwei hapdeng u kyrtong ka NPP u Conrad K Sangma u khun ba kham khynnah tam u PA Sangma bad ka kyrtong ka Congress ka Dikkanchi D Shira kaba dei ka lok jong u Myntri Rangbah ka jylla u Mukul Sangma.
Ia u Conrad la kyrshan da ka UDP, bad ka BJP nalor ka GNC bad kiwei pat katba ia ka kyrtong ka Congress yn kyrshan da ki MLA bad kiwei.