Trei tyngeh ka Hailstorm Operation-3

Shillong, 28 Iaiong:
San ngut ki snar ehrang ka seng kiengatiar ka GNLA ki la wan pyndem wait noh mynta ka sngi ha u khliehduh ki pulit u Director General of Police (DGP) u Rajiv Mehta ha Shillong. Kane ka jingwan pyndem kine ki san ngut ki dkhot ka GNLA, ka dei namar ka jingtrei kam tyngeh ka Hailstorm Operation-3 kaba khynra naphang ia ki lehnoh ha Garo Hills ha kine ki sngi.
Kiba wan pyndem hynne ka sngi ki kynthup ia u Rakseng Ch Marak ba khot sin kum u Geloram na Kolabari Rongsak ha East Garo Hills, u Krewingbirth S Sangma ba khot sin kum u Gongga na Deku, u Jambil Ch Momin ba khot sin kum u Jamindar na Deku, u Walban R Marak ba khot sin kum u Bawil na Siju bad u Tarzan Ch Sangma ba khot sin kum u Ruby na Nongal kiba dei na South Garo Hills District.
Kine ki la wan pyndem ryngkat ki tiar ialeh kynthup 3 AK-56, 1 carbine, 1 G-3 rifle, 1 grenade, 1 HK magazine, 6 AK magazine, 1 Beretta Pistol magazine, 1 G-3 magazine, 1 carbine magazine bad 519 ki kuli  AK (421 tylli), G-3 (5.56) – (22 tylli) bad 7.62 mm (76 tylli).
“Ngim sngew iahap shuh ban don ha ka seng namar ba ka long pynban ka jingma bad ka jingmynsaw ia ki paidbah”, la ong u Krewingbirth haba kren sha ki nongthoh mynta ka sngi.
U la ong ba bun ki dkhot kim sngewthuh ia ka jingmut jong ka jingdawa Garoland watla ia ka GNLA la thaw ban dawa ia ka jylla Garoland.
U la iathuh ruh ba ia ka jinghikai la ai ha Bangladesh lyngba ka jingiarap ka ULFA.
Kiba bun, katkum ka jingiathuh u Krewingbirth dei ki khynnah ba dang khie hapdeng 15 haduh 16 snem.
U la  ong ba ki khynnah ki la shah pynbor ban iasoh bad ka GNLA da u Commander–in- chief (CIC)  u Sohan D Shira, uba byrngem ia ki lada kim rung ha ka seng.
Katba na ka liang u Mehta  u la ong ,”Ka daw ka jingwan pyndem jongki, ka dei namar ka jingkynduh jingeh na ka jingkhynra ki pulit da ka Hailstorm Operation-3 bad ka jingshim khia jong ki nongialam Balang”.
U DGP u la ong ba ym tang kine, kin don ruh sa kiwei kiban wan shakhmat ban phai noh sha ka lynti kaba jai jai.Kine ki lehnoh ki iasoh bad ka seng ha u snem 2012 ba la hikai da ka ULFA ha lum Durama Hills uba don ha East Garo Hills.
Ki ioh jinghikai ban pyndonkam ia ki bom IED bad ki tiar siat nalor bun jait ki kam runar.