Thung pud ka Bangladesh ha jaka rep ki paidbah ka Umpyrchin

Shillong, 27 Iaiong:
Ka Meghalaya Border Area Development Welfare Association (MBADWA) ka la thoh sha u Deputy Commissioner ka East Jaintia Hills ban pyntip sha u ba khyn diat sngi mynshuwa ka la don ka jingkyntur pud ka Bangladesh hapoh u pud u sam ka India ha kaba ka la pynieng mawpud ruh ha ka jaka ba dang hap hapoh ka India. Ka jingthoh sha u DCkaba la soi da u President katei ka seng u Lakhon Lamin ka la ong ba la pynieng ia ki mawpud ha ka jaka kaba don hajan ka jaka rep ki briew ka shnong Umpyrchin, Lahelein bad ka Huroi bad ka la shim ruh kumba 100 mitar ka jaka jong ka India bad ka la kurup lut ia ki jaka rep jong ki paidbah kitei ki shnong.
Ka jingthoh sha u DC ka la pyntip ba ka Bangladesh ka la tam ia u mawpud Pillar 1315,1316,1317 bad ia katei la leh khlem ka jingtip ki trai jaka,katei ka seng ka la pan jingpynshai na u DC halor katei ka phang bad ia katei ka jingthoh ka la phah kopi sha u bah Prestone Tynsong myntri ka tnad Border Area, u Dr.Mukul Sangma myntri rangbah ka jylla,kong Roshan Warjri myntri kam pohing,u ma Shibun Lyngdoh President BJP,ma Hopeful Bamon u MLA katei ka thaiñ , u ma D.Pohshna MDC katei ka thaiñ bad sha u President KSU, FKJGP, HNYF bad RBYF.