Kynnoh ba batbor U DTO barim ka Jowai, ia ar ngut ki khun ruit lajong

Shillong, 25 Iaiong:
Ka kong Darika Dkhar na ka shnong Tpep Pale, Jowai ka la ujor sha ki pulit ba u para kynsie jong ka u C.Khonglam uba shong basah ha Mawlai Kynton Massar uba dei ruh u DTO barim ka Jowai (West Jaintia Hills) ryngkat bad uwei pat u paralok jong u, u la batbor bad bunsien ia ar ngut ki khunruit jong u (kiba la buhrieh kyrteng, kawei kaba dang 14 snem karta bad kawei pat 12 snem karta). Kitei 2 ngut ki dei panah ia u bah Khonglam.
Katkum ka jingujor la ong ba u la leh ia kitei ki kam jaboh ha ka por ba ki dang ia shong ia sah lang bad u ha ka ing sorkar jong u (Quarter) kaba don ha Jowai kata naduh u snem 2015 haduh u snem 2015. Ha katei ka jingujor la kynnoh ruh ba u ju pynbor ia ka lok jong u bad ki khunruit jong u ba kin dih kyiad bad hadien kata u ju pyni ia ki phlim awria bad u sa batbor ia ki, haba ki pyneh ia kaei kaba u bthah ka nongujor ka la ong ba u shoh u ktah kti ia ki bad u la byrngem laiphew jait phew skit.
Katkum ka jingtip ba la ioh la ong ba ka jingpynslem ia ka jingujor ka dei namarba ka la khlad noh ka lok jong u ( kmie jong kitei ki ar ngut ki khynnah rit) kaba dei ruh ka shi para bad ka nongujor bad ka tip dier por ia katei ka jingjia kaba kitei ki khynnah ki la phla hadien ba ki la wan ban shong ban sah ryngkat bad ka. Ka kong Dkhar ka la ujor ruh ba ia katei ka kam u bah Khonglam u la leh ryngkat bad u nongniah kali jong u uba la tip kyrteng kum u bah P.Mulieh na ka shnong Ialong, Jowai. Ki pulit kim pat ioh kem iano iano ruh haduh ba thoh ia kane ka khubor. Hynrei la rejistar case Jowai PS C/No 83(4)16U/S 325/506/34 IPC R/W Sec.04/12 POCSO Act R/W Sec 23/25 Juvenile Justice Act 2000.