Bun kiba paw kyrteng, ka skim pat kim ioh satia

Jowai, 25 Iaiong:
Ka Dorbar Shnong Niriang, West Jaintia Hills District ka la dap da ka jinglyngngoh ban ioh jingtip lyngba ka RTI ba ka rukom pyntreikam ia ka Skim Integrated Watershed Management Programme (IWMP) naduh u snem 2010 haduh 2015 ka long pynban ka skim iabam sap tang hapdeng ki katto katne ngut, ym na ka bynta ban myntoi ki paidbah nongshong shnong.
Ha kane ka sngi Saitjain, u Rangbah shnong u la lum da ka dorbar ban bishar bniah ia
katei ka skim sorkar bad ia ka RTI kaba la ioh da uwei na ki nongshong shnong u ma Peter Kharmuti.
Ka tnad Sorkar Water and Soil Conservation Jowai Division ka la pyntreikam ia katei ka skim ha ryngkat ka Committee kaba la tip kum ka Khlieh Labar & Liar Niriang Watershed Committee bad ka jinglut baroh ka long duna ia ka shi klur tyngka.
“Katei ka pisa kam shym la poi sha ki paidbah nongshong shnong, kiba ioh myntoi kidei tang kito ki ba don ha ka party Congress”, la ong ki paidbah katei ka shnong. Bun kiba paw tang ka kyrteng hynrei kim ioh pat ia ka jingmyntoi bad don ruh kiba paw kyrteng bun bunsien bad bun ngut na ka juh ka longing.
Katkum katei ka RTI la lap ruh ba ka ka kor siat khniang la thied ha ka dor kaba T.5000/- tyngka kawei katba ka dor iew kaba rem tam kan poi tang kumba T.2000 tyngka. Na ka liang ka Dorbar shnong ka la ong ba kan dang iai bud dien ia kane tad haduh ban dalap ia kiba donkti ban bam ia ka pisa jong u paidbah bad ka la dawa ruh ban pynshitom baroh kito kiba donkti.