Pulom ka Shad Mawlam, ba diaw U Lyngdoh Makha

Shillong, 24 Iaiong:
La pulom ka shad jong ka Raid Mawlam, hynnin ka sngi bad ka daw, ka long namar ba u ther u lapbad lem bad ka jingbom pyrthat kaba jur bha.
Katei ka jingshad, kaba dei ban sdang kumba ju long hi baroh shisngi, kaba dei ban sdang naduh dang step jong ka Sngi Saitjain, hynrei, la khanglad da ka jingther bym sangeh jong u slap baroh shisngi kynthih. “Ki nongshad, ki ioh ban ia shim bynta, tang shi kynta eiei, kaba sdang naduh 3.30 eiei, hynrei, la hap ban pynsangeh noh, namar ba ki la ia jhieh lut” ong U Bah Sik Buhtep, U Sordar jong ka Raid Mawlam, haba iakren bad U Rupang.
Ha ka por janmiet, lei ka la nang sniew shuh ka mariang, ha kaba ula trei sa u pyrthat, uba sdang naduh ka por 6.30 janmiet bad u pyrthat, ula tied ia ka iing dorbar jong ka shnong, kaba la pei thliew bad ha ka por 10baje mynmiet, ha shwa ba un sangeh syndon noh, ula ioh ban tied pyniap ia uwei u sniang rangbah jong ka kong Pli Buhtep, ong U Sordar.
“Ka jingkhanglad jong ka mariang baroh shisngi, ka dei na ka daw jong ka jingsngewsih U Lyngdoh Makha, namar ba kam biang ka khan ka khein” ong shuh shuh U Sordar, ha kaba ula iathuh ba ka la don ka jingia peit sbai mynta ka sngi bad kaba pyni ia ka daw jong ka jingsnewsih jong U Lyngdoh Niam, uba la ngeit ba u dei uba peit ia ka Raid Mawlam.
Ki don 160ngut ki nongshad, kiba wan na ki dong bapher jong ka thain Riwar Mihngi, ban ia shim bynta ha katei ka Shad jong ka Raid Mawlam, hynrei, da ka jingpynthut jong ka mariang, katei ka sngi, ka la shu lehnohei noh, ha ryngkat ka jingdon jong u myntri ka tnat border Area, U bah Prestone Tynsong, lem ba U Syiem ka Hima Khyriem, kiba la leit ban sakhi lang, kum ki nongshah khot sngewbha.