Phah surbe shwa ban ker sainar, dawa ka CCIB na u Myntri khappud

Shillong, 22 Iaiong:
Ka Co-ordination Committee on International Border (CCIB) mynta ka sngi ka la dawa ba ka sorkar pdeng ka dei ban surbe shwa ban ker sainar shiah ha khappud ka Bangladesh.
Ka kynhun na ka CCIB ka la iakynduh ia u myntri khappud ka jylla u Bah Prestone Tynsong da kaba kyntu ia u ba un iakren bad ka sorkar pdeng ba kan surbe thymmai shwa ban ker sainar shiah ha ki bynta ka khappud ka Khasi bad Jaintia Hills bad ka Bangladesh.  Ka CCIB ka la phah ruh ia ka jingthoh sha u  MP u Bah Vincent H Pala uba don lang ha kane ka jingiakynduh ha kamra u Bah Prestone.
“Ka sorkar jylla ka dei ban iakren bad ka sorkar pdeng ba kan surbe thymmai shwa ban ker sainar shiah ha ki bynta khappud bad ka Bangladesh”, la ong u nongkren ka CCIB u GH Kharshanlor.
U Bah Kharshanlor u la ong ba ki deputy commissioner ka Khasi Hills bad ka Jaintia Hills ki la shim khia ban sdang noh shaid shaid ia ka jingker sainar shiah. “Ngi kyntait ia ka jingker sainar shiah namar ba ka jingiateh jutang kam long kaba iahap ha kaba kim shym la shah shkor ia ki jingeh jong ki paidbah ka thain khappud” u la ong.
U la ong ba ka jylla Meghalaya kan sa duh bun ki akar ka khyndew da ka jingpyntreikam ia ka jingiateh ka India bad ka ri Bangladesh.
U Bah Kharshanlor u la ong ba u myntri khappud u la kular ba un  iakren bad ka sorkar pdeng halor kane ka kam.
Ka jingong ba ka Meghalaya kan ioh 240 akar ka jaka ka dei tang ha ka jingthoh hynrei ha ka jingshisha ka Meghalaya kan duh 500 akar ki jaka, la ong u nongialam ka CCIB.