Ngim pat shah ia ka St.Peters’ ban pynlong skul:DC

Shillong, 19 Iaiong:
U Deputy Commissioner ka East Khasi Hills u bah Peter Dkhar u la ong ba kumba ka long haduh mynta ki bor District kim pat ailad ia ka St.Peter’s Higher Secondary School ba kan plie biang ia katei ka skul bad haduh mynta u la ong ba kam pat mih ka ripod jong ka jingtohkit kaba ki tnad sorkar bapher bapher ki la leit hashen ban jurip ia katei ka skul kaba la pluh.
Haba ia kren bad u Rupang lyngba ka phone u DC u la ong “Haduh mynta ngim pat shah ia ka St.Peter’s ba kan pynlong skul, kim lah ruh ban kynriah jaka shawei, kan dang long hi kumto kumba ka long naduh ba ka la pluh” ong u bah Peter Dkhar haba ia kren bad u Rupang lyngba ka phone.
U la ong ruh ba ka bor District kam pat ai hukum ia katei ka skul ba kan plie biang haduh ban da dep ka jingtohkit. Haba la kylli hato katei ka skul ka la lah ne-em ban bteng biang ia ka jingpynlong skul lane ban kynriah sha kawei pat ka jaka ‘Em –em haduh mynta kumto hi kumba ka la ing kan neh shuwa kumto beit’ ong u bah Peter Dkhar-DC ka East Khasi Hills .
Lah ban pynkyn maw ba khyndiat sngi mynshuwa ki tnad sorkar bapher bapher kynthup ka Majistor na ka ophis u Deputy Commissioner ka la leit ban jurip ia ka St.Peter’s Higher Secondary School ban peit hato la ka long ne em kaba dang shngaiñ ia ki khynnah lada yn bteng biang ia ka skul ha katei ka juh ka jaka. Hynrei ha katei ka jingleit jurip bun ki ophisar ki tnad bapher bapher ki la kyrngah khlieh ban dang bteng ia ka skul ha katei ka juh ka jaka.