Rah pla kad ki nongialam Congress, pynrem ia ka BJP

Shillong, 18 Iaiong:
“Ka sorkar ba ialam da ka seng Congress ha kane ka jylla ka skhem bad Congress ka dei ka ing kaba ia tylli haduh mynta” ong u bah D.D Lapang, President ka Meghalaya Pradesh Congress Committee, (MPCC)ha ka jingialang paidbah jong ka seng Congress kaba la long mynta ka sngi ha Congress Bhawan ban pynpaw ia ka jingpyrshah ia ka sorkar NDA kaba ialam da ka seng BJP. Ki nongialam ka seng Congress ki la kynnoh ba ka sorkar BJP ka thmu pynkulmar tdong tdong khlieh khlieh, ha ki jylla ba synshar da ka seng Congress da ka jingthmu ban pynkhyllem noh ia baroh ki sorkar ba ka Congress ka bat ia ka bor synshar.
Ha katei ka jing ialang pyrshah BJP jong katei ka seng la iohi ba la don ki nongialam rangbah katei ka seng kynthup naduh u bah DD Lapang, President MPCC, uba dei ruh u nongaibuit ai bor ia ka sorkar jylla, u symbud myntri rangbah ka jylla, ki myntri sorkar, ki MLA, MDC bad ki nongkitkam ka seng Congress na ki District, Block bad na kiwei pat ki jaka. Ia katei ka jingialang pyrshah BJP ka seng Congress ka la pyndep katkum ka hukum ba la pynbna da ka All India Congress Committee(AICC).Ha katei ka jingialang paidbah ki nongialam ka seng Congress ki la ia pyrta jam da ki ktien pyrshah ia ka BJP bad ki la rah ruh ia ki jingthoh pla kad kiba la thoh pynrem ia katei ka seng.
Haba kren ha katei ka jinglum lymbung ki dkhot ka seng Congress u bah D.D Lapang u la ong ba katba ka ri baroh kawei ka dang rakhe ia ka lyngkhuh sngi kha ba 125 jong u Dr.BR Ambedkar, u Myntri Rangbah duh ka Ri pat u Narendra Modi u dang pyrshang ban thaw da kiba bun ki buit ki lad ban pynpra sorkar ha ki jaka ba synshar da ka seng Congress. “Ki buit kiba ki pyrshang kin ym pynpluh da lei lei ruh ia ka ing jong ka seng Congress” ong u bah Lapang.
Katto katne na ki jingthoh pla kad ba ka seng Congress ka la rah ha katei ka jingiakhih pyrshah BJP jong ka la thoh ‘Modi sangeh noh ka jingpyniap ia ka synshar paidbah’-‘Ka sorkar ban wan ba ki paidbah kin jied dei ka jingkyntait ia ka BJP’ kane ka dei ka jingthoh pla kad ba la rah da u ma Sniawbhalang Dhar myntri ka tnad PWD ka sorkar jylla katba u MDC shu sieh barim ka KHADC u bah Garbiel Wahlang pat u la rah da ka jingthoh kaba la thoh ha ka ktien Hindi kaba ong ‘Lathi Dando ki sarkar Nahi Chalegi Is Baar’.