Dei ban thung nongiasaid kiba la ih bha, ong ka MPCC

Shillong, 15 Iaiong:
Ki stad ain ka Meghalaya Pradesh Congress Committee (MPCC) ki la kyntu ia ka sorkar ba kan thung ia ki nongiasaid ain kiba la ih bad tbit bha ha ka kam ban iasaid ia ki mukotduma ka sorkar.
Ka Legal and Human Rights Departments (LHRD) ka MPCC kaba la iashong jingialang mynta ka sngi, ka la kyntu ruh ia ka sorkar ba kan tei ia ka jingiasngewthuh jingmut bad ki district council ban pynthikna ba ki ain ba la thaw kin nym iatyngkhuh.
Ia kane ka kynhun ki riewain ka MPCC la khlieh da u nongiasaid ka Meghalaya High Court, u Bah VGK Kynta.
“Ia ki mukotduma ka sorkar dei ban iasaid bha da kaba thung da ki riew ain ba la ih bha bad ba la shemphang ban pynthikna ba ka mukotduma kan long kaba jop” la ong u Bah VGK Kynta ha ki nongthoh khubor mynta ka sngi.
Ka sorkar ka dei ban thung da ki riew ain ba la tbit bha ha High Court, Supreme Court lane ha ki kashari ba kham rit, u la ong.
U la ong ba ka jingthung nongiasaid ba dang khynnah kan ktah bha ia ka sorkar namar ba kin shem jingeh ban iasaid ia ka mukotduma.
Ha kajuh ka por, u la ong ba ia ka riti dustur dei ban iada bad ban pynneh namar ba ki dei kiba kongsan bha ha ka synshar khadar bad ka bishar ka khadar.
Ha kane ka LHRD la long dkhot da u R Jana Nongbet kum u secretary, Kenny Wahlang, Purabi Sarma, Sunil Kumar Agarwal, Daniel Stone Lyngdoh, Kynphamlin Kharlyngdoh bad u Wanbhabok Virgil Marbaniang kum ki dkhot.