Sha kashari, byrngem U CEM, na ka thung kam EM KHADC

Shillong, 14 Iaiong:
U Chief Executive Member ka KHADC u bah Pynshngaiñ N Syiem u la ong ba ka KHADC kan sa phah shithi jing pynkynmaw biang sha ka tnad District Council Affairs halor ka kam Executive Member kaba ka KHADC ka la pan jing mynjur na katei ka tnad ba kan mynjur ia ka kyrteng jong u bah Donkupar Sumer kum u EM ba thymmai uba la wan mih bujli ha ka jaka u bah Donevan Kharwanlang uba la leit ban shong noh ha ka shuki Deputy Chairman.
U bah Pynshngaiñ u la ong ba lada ka sorkar kan ym sngap ia ka jing pynkynmaw, ka KHADC kan hap ban iaid katkum ki aiñ bad ki kyndon jong ka 6th Schedule, kaba ka lah ruh ban poi sha ing kashari, “Ngi hap ban phah shithi pynkynmaw shuwa,hadien ngin sa ia peit,lada kam urlong ngin hap ban peit ia ki kyndon bad ki aiñ jong ka 6th Schedule ban peit ia ka bor ba ngi ka District Council ngi don ban leh” ong u CEM haba ia kren bad ki nongthohkhubor ha kamra treikam jong u.
Lah ban pynkynmaw ba ka kyrteng u bah Donkupar Sumer ka la sahkut ha ka tnad DCA da ki bnai naduh ba la phah ia ka kyrteng jong u kum u EM ba thymmai bad haduh mynta ruh utei u MDC ka UDP na Umsning um pat ioh ban shong ha ka shuki EM naba ka DCA kam pat mynjur ban phah ia ka kyrteng jong u sha u Lat.