Kyllon iap U Commander ka LAEF

Tura, 13 Iaiong:
Hadien ba ki pulit ka East Garo Hills ki la ioh jingtip shaphang ka jingdon jong u LAEF Commander-in Chief u Augustine Marak lem bad kynhun jong u 10 ne 12 ngut ba ki dang riehtngen ha ka khlaw kaba don ha Rongjeng, ki la leit mar mar sha kane ka jaka. Haba ki la poi ha kane ka jaka ki lehnoh ki la pynphai kuli ia ki pulit kiba la pynphai kuli kylla. La iathuh ba kane ka jingiasiat ka la neh kumba 45 minute eiei.
Shuh shuh ki tyllong ki iathuh ba ki pulit ki la ioh ban siat ia u CNC u Augustine Marak.
La iathuh ruh ba hadien ka jingiasiat ki pulit ki la pynlong ka jingtohkit ia kane ka jaka bad ki la ioh ban kurup ia ka suloi AK, kawei ka magazine bad shibun ki kuli.
Ki tyllong ki iathuh ruh ba uwei na kine ki lehnoh ia uba la tip kyrteng kum u Walsrnag N Areng na Chichra Apal u la shah kem hadien ka jingiasiat.
Ha ka juh ruh ka por ki pulit ki la pynkit noh ia ka met jong u Augustine Marak sha ka Civil hospital kaba don ha Williamnagar na ka bynta ban pyndep ia ka post mortem.
Haba khein lang baroh, ki pulit ki la ioh ban kurup haduh 72 tylli ki suloi Ak, lai tylli ki mobile bad hynniew tylli ki simcard na kane ka jaka ba don ka jingialeh.