Or pait ka Hospital Bethany ha Nongpoh

Shillong, 13 Iaiong:
U Jumai uba khlaiñ bor haduh 6.8 Richter Scale u la pynkhynñiuh ia ka nongbah Shillong mynta ka sngi. Utei u jumai u la sdang ban pyn khynñiuh ia ka nongbah Shillong ha ka por 7:25 baje mynmiet bad u la neh kumba 1 minit tam. Ha ka por ba utei u jumai u la khih kiba bun ki kynthei ki khynnah ki la lynniar bad mih shabar ka ingsah jong ki bad ki la phet kulmar kat shaba lap.
Ki ing paki dulan kumjuh ruh ka Secretariat ka la khynñiuh ha katei ka por khih jumai bad kaba kham pyntieng shuh shuh ia ki paidbah ka dei ka jinglip kynsan ka bording ha ka por ba dang khih utei u jumai bah. La ong ba ka ktem bah ba utei u jumai u la khih ka dei ha khappud bad ka Myanmar bad u la ktah ruh ia ka nongbah Shillong.
Ha kawei pat ka khubor la iathuh ba ka hospital Bethany ha Nongpoh ka la or pait na ka daw ka jingkhynniuh utei u jumai ba khlain bor bad ki la don ruh ki bynta jong ka kynroh jong ka kiba la hap khyndiat khynsoit. La iathuh ba ha katei ka por ki nongpang bad ki nongtrei katei ka Hospital kila phet ruma na ka daw ka jingtieng palat. Ha katei ka jingkhynniuh jumai la ong ba ki don bunbah ki dak or pait ha ki ing paki dulan ha kiba bun ki jaka.