Pynkhuid U BM Birla bad ki Paralok ia ka Iawmusiang

Jowai: Ka Iawmusiang ka la sma iwtung na ka daw ka jingsangeh trei ki nongtrei ka Jowai Municipal Board na ka daw ba kim shym la ioh tulop la 8 bnai kynthih. Ki jaboh jabain na Iawmusiang ym
don shuh ba sar ba lum bad kit ban leit bret sha ka jaka bret niut.
Ki jaboh jabain ki la lang ha rud surok ha Iawmusiang bad ki la sma iwtung, hynrei ha kane ka sngi Saitjain u Branch Mananger ka Birla Insurance Company, u ma Nehimaiah Tyngkan ha ryngkat ki paralok jong u bad ruh da ka jingiatreilang ka Jaintia Journalist Association (JJA) la pynkhuid ia katei ka iew da kaba kit ia kitei ki nuit ban leit bret sha ka jaka bret nuit kaba jngai kumba 15 km na Jowai.
Utei u rangbah bad ki paralok jong u kiba bym dei trai shnong na Jowai, ki la treimon sngewbha da kaba pyllut hi da lade ban shimwai haduh 8 tylli ki kali Bolero Pick Up ban kit ia kitei ki jakhlia na ka bynta ban wanrah iaka jingkhuid ha Iawmusiang.
Kumban shu pynkynmaw, ki nongtrei ka Jowai Municipal Board (JMB) ki la sangeh treikam namar ka jingbym ioh tulop la phra bnai lynter.
Na ka liang u Deputy Commissioner ka WJH, u Arun Kumar Kembhavi u la ai ka jingiaroh shi katdei eh ia ka kam treimon sngewbha jong utei u rangbah bad ki paralok jong u.