Pyneh ki nongdie dukan kyiad

Nongstoin, 03 Iaiong:
Hadien ba ka shnong Pyndenglawar West Khasi Hills, ka la rai ba kan pynkut noh bad ban nym shah shuh ban pynthym mai biang ia ki NOC, ia ki dukan kyiad kiba don ha katei ka shnong bad na ka liang jong ka shnong kala ai por ruh haduh ka 31 tarik jong u bnai ba la lah ia kitei ki dukan kyiad ba kin khang noh shi syndon, hynrei na ka liang jong kitei ki trai dukan die kyiad ki la pynkhein da kaba ialeh pyrshah ban plie ia ki dukan ki jong ki kata wat hadien ba la kut noh ka jingai por na ka shnong.Katei ka jingialeh pyrshah jong kitei ki dukan kyiad kala pynlong ia ki ba bun kynhun kum  ki sengbhalang, senglongkmie, bad ki wei ki wei ba kin hap ban ieng pyrshah ban nym ailad ia katei ka jingialeh pyrshah ka jong ki, bad katei ka paw shai ruh ha ka sngi saitjan jong ka taiew bala lah ki sengbhalang ba kynthup ia ka WYF, HYC, ki senglongkmie na ki shnong bapher bapher jong ka thain Nongstoin, ryngkat ka shnong Pyndenglawar, ka Synjuk ki rangbah shnong ki saw tylli ki shnong ki la hiar sha katei ka jaka ban pynlong syndon ka jingpahara ban nym ailad shuh ia ki dukan kyiad ba kin nang plie.Hadien katei ka jingpahara na ki dkhot jong ki senglongkmie na kylleng ki shnong jong ka thain Nongstoin, ha ryngkat ki sengbhalang kala pynlong ia ki lai tylli ki dukan kyiad kiba don ha katei ka shnong ba ki hap ban khang noh shi syndon, bad hadien katei na kaliang jong ki sengbhalang, senglongkmie ha ryngkat ki nongialam shnong ka shnong Pyndenglawar bad ki wei ki wei ki shnong kiba mar jan ki la pynlong ruh ia ka jingialang ha Dorbar Hall jong ka shnong Pyndenglawar ban ia tai sani bha halor katei ka kam. Ha katei ka jingialang la ioh ruh ia ka jingkren na baroh ki nongialam jong ki seng bhalang bad ki senglongkmie ia kaba ki la pynpaw ia ka jingpyshah kaba jur halor ka jingiai pynkhein bad ka jingialeh pyrshah jong ki tei ki dukan kyiad watla ka por kala kut noh.Haba kren ha ki nongthoh khubor hadien katei ka jingialang na ka liang jong u bah L.War Secretary jong ka shnong Pyndenglawar u la ong ba ka shnong kala shim ia ka rai ba katba jia katba long ka shnong hi kan nym shah shuh ba kine ki dukan kyiad kin dang don hapoh jong ka shnong