Mynta u dei u ‘nem bha pyni ka khan na Bañiun

Shillong, 3 Iaiong:
Kumba long manla u snem ka Sengbah ki Nongshat Nongkhan ka ju pynlong ia ka shat ka kheiñ ha Bañiun,Upper Shillong ban kyrpad kyrpon na u blei trai kynrad ban peit ban ri ban sumar ia u paidbah paidlang ka ri Khasi Jaintia ha baroh shisnem. La sdang ia katei ka shat ka kheiñ naduh ka por mynstephaduh ban da dep ka kam ka jam ryngkat ka shad ka mastieh ban pynphuh pynphieng ia katei ka sngi.
Haba ia kren bad u Rupang u General Secretary ka Sengbah ki Nongshat Nongkheiñ u bah Jubanlak Hynniewta u la ong ba mynta u snem ka kup bha ka khan bad ka pyni ruh ba mynta u snem u dei u ‘nem bha. U bah Jubanlak u la ong ba la shat la kheiñ ban bit ban biang ka rep ka riang, ka kamai ka kajih, ka koit ka khiah, ka pule dang le bad kiwei. U la ong ba la shat la khein ruh ba u blei trai kynrad un da un ri un ker ia ki samla pule jong ka ri Khasi Jaintia kiba leit ban pule sha bar jong ka jylla bad ka ri ba kin lait na kano kano kaba sniew. Ha katei ka jingshat jingkheiñ u la ong ba la kñia la khriam da ka ‘yiar kynthei bad ‘yiar shynrang, kham hadien pat la sam ia ka um,u khaw ba la kñia sha baroh ki paidbah kiba don hangtei.