Byrngem khang ki Nongtalang bad Jarain ka PHC

Shillong, 1 Iaiong:
Ka shnong Nong talang bad  Jarain  ha War Jantia ki la pyrshah jur ia ka jingthmu ka sorkar ban aiti ia ka Public Health Centers (PHC) bad Community Health Centers (CHC) sha ki seng bym dei sorkar namar ba ki kwah ban pyniaid beit ka sorkar.
Ka kynhun jong ki Rangbah Shnong na Nongtalang bad Jarain ki la iakynduh ia u Myntri ka koit ka khiah u Bah A. L Hek  ban pynpaw ia ka jing pyrshah tyngeh ia kane ka jingthmu ka sorkar ban aiti sha ki seng.
U general secretary ka shnong Nongtalang bad u secretary ka  adhoc committee ki 14 shnong ba hap ha ka CHC Nongtalang u Bah D. Marshiang u la ong “Ka Synjuk ki Rangbah Shnong jong kine ki ar shnong ha ka jingialang kaba la long ha ka 31 tarik Lber, ki la pynlong ia ka jingialang bad la rai ban pyrshah jur ia ka jingthmu ka sorkar ban aiti ia ka PHC, CHC sha ki seng”.
U la ong ba ka Synjuk ka la ong ba ka Synjuk kan nym shah ia ki seng ban wan pyniaid ia ka PHC, CHC ne ki jaka sumar sorkar ha katei ka thain bad ka kwah beit ban pyniaid da ka sorkar.
“Lada ka sorkar ka bteng ban aiti sha ki seng ia kine ki jaka sumar, ngin khang noh syndon ia katei ka PHC”, u la ong.
U la ong ba ka PHC kaba don ha Nongtalang ka la ai ia ka jingshakri kaba paka ia ki paidbah nongpang bad namarkata, ym donkam ban aiti sha ki seng.
Kumjuh u Bah K. Tariang u Secretary  ka shnong Jarain u la ong,  “ka daw ba ki pyrshah ban aiti sha ki seng ka long namar ba don ki jaka sumar ba la pyniaid da ki seng, kim shym la lah ban ai ia ka jingshakri kaba biang ia ki paidbah”.
Hynrei ha kawei ka liang, u myntri sorkar u Bah A. L Hek u la ong ba, “Ka la don ka jingthmu ka sorkar ban aiti ia ki jaka sumar sha ki seng ha ka jylla ka long namar ba ka iakynduh jingeh na ka jingkyrduh doktor, ki nurse, bad kiwei ki doktor specialist.
“Ka sorkar ka sngew ba ban ai ia ka jingshakri kaba kham biang sha ki paidbah, ka kham bha ban aiti ban pyniaid noh da ki seng ia ki PHC bad CHC ha ka jylla”, la ong u Bah Hek.Halor ka jingkynnoh ba don ki seng bym lah ban shakri bha, na ka liang u Bah Hek u la ong ba haduh mynta, ka sorkar kam pat ioh pdiang ba don ka jingpyrshah ia ka jingbym biang ki jaka sumar ba pyniaid ki seng. Ngi dang thmu ban aiti ia ki PHC/CHC sha ki seng kiba tbit bha ban pyniaid ha kylleng ka ri”.U la ong ba ka sorkar kam pat jied ia kano ka PHC/CHC ban aiti ban pyniaid ki seng ha kane ka jylla.