U Babu Chosterfield Khongwir u nonghikai NEHU u la pynpaw ba um don ka jingsngew pyrshah eiei halor ka jingshna jong ka Balang Katholik ia u Diengphna halor jong u Mawiambei hynrei u la ong ba lada long kaba lah dei ban ieh beit kumba u long.
“Ngam pyrshah ia kano kano ka niam hynrei dei ban don ka jingbeit jingryntih namar ba haduh kine ki snem, ym ju don ka jinghuri hura shaphang une u maw”, u la ong u Babu Chosterfield haba twad jingmut u Rupang halor kumno u sngew halor ka jingshna ia u Diengphna halor utei u maw.
U Babu Chosterfield uwei na ki nongthoh bad u nongrwai ba pawnam ka jaitbynriew, uba thaw bad rwai ia utei u maw, u la ong um sngewpher ia ka jingbuh Diengphna halor u maw namar ba kum u nongthoh kot bad nongthaw jingrwai u la dep pyndep ia la ka kular ban pynsahnam shaphang une u maw ba donkam uba don ha Raid Iapngap, ka Ri-Bhoi. “Katba lah ia ki matti uba rim ba jah dei ban pynneh pynsah kumba ki long”, la ong u Babu Chosterfield bad bynrap ba ha katei ka thain dei tang une u maw ba la ieng sakhi kum ka khana ia kato ka thain.
U Babu Chosterfield u la ong ba ha ka por ba u leit ban wad jingtip shaphang utei u maw, u la leit sahmiet bun sngi ban iakren iakhana bad ki paidbah katei ka thain bad ki briew kiba don jingtip shaphang jong u maw bad kiwei kiwei.
“Hadien ba la lah ban lum ia ki jingtip shaphang u mawiambei, nga la pynmih ia ka jingrwai shaphang jong une u maw ha ka kyrteng ka kot kaba u la pynmih ka ‘Saimuka ka Duitara’, u la ong Babu Chosterfield uba sdang rwai naduh ba u dang dap 12 snem ka rta.
Hynrei ha kawei ka liang, u la pynpaw ia ka jingsngew kyndit ban iohi ba u maw u la kylla dur bad um long kumba la paw ha ki snem ba u don ma u bad kane ka la long kumba la paw ha ki lad pathai khubor.
U Babu Chosterfield u la iathuh ba la thaw ia ka jingrwai shaphang une u maw ha u snem 1974-75. U la lah ban pynmih ia kane ka jingrwai hadien ba la trei minit ban wad jingtip bniah da kaba pynlut bun phew sngi bad bun taiew. “Nga la sah ha katei ka jaka da ka taiew, nga shah hikai ban nang ia ka ktien jongki briew bad nga la thaw ruh ia ka jingrwai ha ka ktien jong katei ka thain”, u la ong.
Katkum ka jingiathuh jong u Babu Chosterfield, une u maw u iathuh ia ka khana shaphang ka jaitbynriew kumno u nguid ia ka khun katba ka dang shong halor jongu haba ka kmie ka dang trei ha lyngkha. “Ka khun ka la khot wan noh seh mei ba u maw un sa nguid hynrei ka kmie ka dang bunkam ban trei lyngkha, ka la shu ong ap shi ap bad ynda ka la wan phai na lyngkha ka la lap ba ka lap sa tang u shniuh jong ka khun hajrong maw”, u la iathuh.
U la iathuh ba ki briew na katei ka thain Raid Iapngap ki la ai syrnod ruh ia u halor ka jingthaw jingrwai bad ka jingtrei jongu ban pynsah nam ia une u maw uba don ha katei ka jaka jong ka Raid.
Phi don ban ong eiei?