Ym don ba kheiñ briew ia u Myntri Rangbah ba-ar ka jylla, ha ka tamasa Mawbynna

Mawphlang, 31 Lber: Kiba bun ki heh ki haiñ ki kynrem ki lyndan ki la poi sha ka shnong tynrai ha Maw phlang ha ka sngi sdang jong ka tamasa Mawbynna ne ka Monolith Festival. La pynbit pynbiang ia ki naduh ka jaka shong kaba bit ba biang haduh ki jingai khublei kaba la pynsngew hun ia ki heh ki haiñ kiba la shah khot sngewbha ha katei ka tamasa.
Shuwa ba ka jing ialang plie ia katei ka tamasa kan sdang, la iohi ba kiba bun ki heh ki haiñ ki la don lut hapoh ka jaka ba la pynkhreh naduh u Lat ka jylla u V.Shanmu ganathan, u MP Lok Sabha na Shillong Konstitwensi u Ma Vincent Pala, u nong aibuit ai bor ba rangbah duh ia ka sorkar jylla u bah D.D Lapang, CEM KHADC u bah Pyn shngaiñ N Syiem, ki EM, ki MDC, ki ophisar ka sorkar jylla bad sorkar pdeng kiba la shah khot sngewbha.
Hynrei nalor kitei la iohi ba dang don ruh kiwei pat ki kynrem ki lyndan kiba la shah khot sngewbha ki bym pat lah ban poi ha ka por kaba biang bad la iohi ba ki dang wan kham hadien bad ia kitei ruh la pdiang sngewbha kyrpang ia ki bad la ialam sha ka jaka ba shonglang kiwei pat ki kynrem ki lyndan. La iohi ba u MLA ka Sohra u bah Titos W Chyne uba dei ruh u Secretary barim jong ka Khasi Heritage Conservation Forum u dei uwei na ki heh uba la poi kham dier por bad la iohi ba ki nongpyniaid ia katei ka prokram ki la leit ban ialam lynti ia u bad pynpoi haduh ka jaka kaba shong ki heh ki haiñ (VIP) ia uba shong u Lat bad ki MDC baroh.
Kaba pynlyngngoh eh ha katei ka jingialang ka dei ba hadien katto katne por la wan poi sa u myntri rangbah ba-ar ka jylla u bah Rowell Lyngdoh hynrei la iohi ba ym don ba leit ban ialam lynti ia u bad ym shym la pynshong ruh ha ka jaka ba shong ki heh ki haiñ , la iohi ba u bah Rowell u leit ban shong ha ka jaka ba shong ki paidbah.
Ka la pynkyndit ia une u nongthohkhubor ban iohi ia katei ka jingjia ba ym shym la ithuh ha katei ka Tamasa Mawbynna kat ia u myntri rangbah ba-ar ka jylla bad kaba kham pynkyndit shuh shuh ka dei namarba la pynsngew paidbah lyngba ki tynghung pynsawa ia ki jingaikhublei ia kiba bun ki heh ki haiñ hynrei tang shi kyntien ruh ym shym la iohsngew ba kin pdiang sngewbha lane ban ai khublei ia u myntri rangbah ba-ar ka jylla.
Haba ia kren bad u Rupang halor katei ka jingjia u bah Rowell Lyngdoh myntri rangbah ba-ar u la ong ba ka jingleit jong u sha katei ka tamasa ka dei namarba u la shah khot sngewbha, “Nga leit ba nga shah khot sngewbha. Ym don ba iohi ia nga, nga shong ha ka jaka paidbah” u la ong.