Bom ki paidbah ia u bar jylla, ha iew Shallang, ha ban da jem jai

Nongstoin, 31 Lber:
U wei u bar jylla u ba shong dukan ha iew Shallang u la shah tied ha ki paidbah katei ka thain haduh ba un da jem hi jai, katei ka jingjia kala jia hynnin ka sngi ha kapor 4 baje janmiet ha khmat ka dukan jong u tei u bar jylla hadien ba kala don ka jingiaklumar bad ka jingiashoh ia dat ha katei ka jaka.
Katkum ka tyllong khubor bala ioh lum da u nongthoh khubor la ong ba katei ka jingjia kala mih hadien ba u tei u bar jylla u la dung da ka khainshi ia u wei u samla Khasi u ba wan ban thied jingthied na ka dukan jong u bad ym shym la tip tikna ba kaei ka daw kaba la pynlong ia ki haduh ba kin da poi haduh u tei u pud.
Mar ia iohi ia katei ka jingjia ki paidbah kila ia boi kum u ngap bad ha katei ka jaka bad ki la tied ruh ia u tei u bar jylla haduh ba un da jem jai, ia ka kyrteng jong u tei u bar jylla bad u tei u samla khasi haduh ba thoh ia kane ka khubor ym shym pat la tip satia hynrei ban pyntikna ia katei ka jingjia ha ka sngi palei jong ka taiew la lap shai ba ki ba bun ki dukan jong ki bar jylla kiba don ha Shallang ki la khang khyrdep lut khait.
Na ka liang jong u nongthoh khubor u la iohlad ruh ban kylli ia ka daw ba ki khang dukan bad ka jubad na ki bar jylla ha Shallang kila pynpaw ba ka jingkhnang dukan ka jong ki ka long halor ka jingsngewlem ia ka jingshah shoh shah dat jong u tei u barjylla u ba shong dukan ha Shallang.
Shuh shuh ban pyntikna bha ia katei ka jingjia u nongthoh khubor u la iohlad ban iakren bad u Officer In- Charge ka Shallang Police Station hynrei na ka liang jong u, u la ong ba ka don kajingjia hynrei kam pat da long kaba jur ia kaba na kaliang jong ki, ki la lah ban teh la kam, bad la sngewthuh ruh ba haduh mynta ka sngi ym shym la don kano kano ka jingwan ujor halor katei kajingjia.
Halor katei ka jingjia na kaliang ka Khasi Students Union (KSU) Mawshynrut Circle lyngba u general Secretary samla A.L.Nonglait haba kren ha ki nongthoh khubor u la ong ba ka seng hi ka pynrem jur halor katei kajingjia , namar ba hapoh Shallang hi kum kitei ki jingjia kila ju jia na kapor sha kapor.
Shuh shuh u bah Nonglait u la ong ba na ka liang jong ka seng ka kyntu ruh ia ki bor pulit bad ia ki bor shnong ba kin long kiba peitngor bha khnang ba kum kitei ki jingjia kin nym jia shuh hadien habud.