Pynjulor u phria bad eriong ia ki jingthung jingtep ki nongrep ha Ri Bhoi

Nongpoh, 30 Lber: Ki ar tylli ki Shnong ha Ri-Bhoi District, ba kynthup ia ka Shnong Klew bad Mawbsein, kiba dang ba hap hapoh ka Umsning C&RD Block, mynta ka sngi ki la shah pynjulor ia ki jingthung jingtep ki jong ki, hadien ba u phria bad ka eriong ki la lynshop ïa ki jingthung jingtep.
Kane ka jingkhie jong ka eriong bad hap u Phria, ka la jia mynta ka sngi ha ka por 2 baje nohphai sngi, kaba la ktah jur bad pynjulor ruh ïa shibun ki jingthung jingtep jong ki nongrep jong kitei ki ar tylli ki Shnong ba kynthup ïa ka Mawbsein bad Klew. [bteng sla 7]
Haba pyntip halor kane, u Bah P.Makdoh, Sirdar ka Raid Madan Kyrdem, u la ong ba kane ka jingwan ka eriong bad u Phria mynta ka sngi, ka la pynduhnong shibun eh ïa ki nongrep, namar dei ha kane ka por ba bun ki jingthung kiba la sdang ban khie lung, hynrei kane ka jingwan jong ka eriong bad u phria ka la pynjulor noh ia kine ki jingthung bad ka jingpynjulor kaba kham ktah ka dei na u phria.
U la iathuh ruh ba kat haduh mynta, ym pat lah ban ai ïa ka jingtip kaba thikna katno tylli ki Shnong, kiba la ngat ha kane ka jingshah lynshop ha katei ka eriong bad u Phria, hynrei katkum ka jingtip kaba malu mala, la ong ba dei tang ka shnong Klew bad Mawbsein kiba la khamjur ka jingshah ktah. U la iathuh ruh ba ia mynta ym pat lah ban tip ba haduh katno ngut ki nongrep kiba la ngat ha katei ka apot shah pynjulor ia ki jingthung jingtep ki jong ki.
“Tang mar ia ioh ia ka jingujor na ki paidbah nongrep, halor jong katei ka jingwan lynshop da ki bor jong ka mariang, wut wut ngi la leit ban pyntip sha ki ophisar ka Umsning C&RD Block, ba kin wan ban jurip ia kitei ki jaka kiba la shah ktah ha ka jinglynshop da ka eriong bad u phria” bynrap u Bah P.Makdoh.
Namarkata, na ka liang ka jong u kum u Sirdar ka Raid, u la kyrpad ruh ia ki bor sorkar District, ba kin pynkloi ban jurip ia ki jaka rep ba la shah ktah ha katei ka jingwan lynshop da ki bor mariang, namar kane ka jingwan ka eriong bad u Phria ka la ktah jur ia ki nongrep kiba la trei shitom, hynrei ki khlem poi pyrkhat ba kin hap pynban ban mad ia kum kine ki jingjia ba sngewsih, la bynrap u Bah P. Makdoh.