Plie paidbah u CEM ka KHADC ia ka iew Mawser

Shillong,30 Lber:
U Chief Executive Member ka KHADC u bah Pynshngaiñ N Syiem u la plie paidbah mynta ka sngi ia ka iew Mawser kaba don ha thaiñ Ri-Bhoi –Zero Point lynti ban leit na Kyrdemkulai. U CEM u la plie paidbah ia katei ka iew ha ryngkat ka jingdonlang u MDC katei ka thaiñ u bah Donkupar Sumer, u EM ba peit ia ka iew u bah Hadrian Lyngdoh, ka MDC na Nongpoh ka kong Rona Khymdeit, bah Morningstar Mawsor MDC ka Mawshynrut, u myntri K.Langstieh ka Hima Mylliem, ki sordar, ki rangbah shnong bad ki paidbah katei ka thaiñ.
Katei ka iew kaba dang shu plie thymmai kan long shisien shi taiew kata sdang naduh mynta ka sngi bad kan hap ryngkat bad ka iew rynghep, ha ka sngi ba plie ia ka tei ka iew la pynlong iew artad ha kaba la iohi ba la don bun tylli ki dukan kiba ki paidbah ki la ia bunkam ia ka die ia thied.
U bah Pynshngaiñ haba kren ha katei ka sngi u la ong ba la lah ban plie ia katei ka iew dei lyngba ka jingtrei shitom u MDC jong ka tei ka thaiñ u bah Donkupar Sumer u bym shym la ai thiah a idem ia u bad u la ong ba ka mat ban plie iew ha Mawser u bah Sumer u la buh naduh ka por ba synshar ka ARPA hynrei hadien ka jingkhyllem noh ka ARPA ruh u la ong ba u bah Sumer u la wan tynruh sha u ba dei ban pynthikna ban plie beit ia katei ka iew. Ka jaka ba la pynlo ng ia katei ka iew ka dei kaba jaka kaba la ai sngewbha da ka kong Kyntiew Kharsati kaba ha katei ka thaiñ ki ju ong ka kong Bari. U CEM u la kyntu ia ki paidbah katei ka thaiñ ba kin sumar bha ia ka tei ka iew jong ki ka ban ai jingmyntoi ia ka thaiñ bad ka ba iarap ruh ha ka ioh ka kot khnang ba kan long kaba lah ban khring wat ia ki briew kiba na sor ruh.
U bah Donkupar Sumer , MDC u la ong ba ia katei ka iew la lah ban shna lyngba ka jingioh tyngka na ka KHADC T.10 lak tyngka kaba la ioh lyngba ka 13th Finance Commission bad u la kyrpad ia u CEM ba un iarap tyngka shuh shuh ban pynjanai ia katei ka iew. Kumba ka long mynta katei ka iew ka don kumba 200 tylli tam ki dukan rit kiba dang shna malu mala da ki dieng bad ki don 41 tylli ki dukan kiba la phiah rit kiba la shna da ka KHADC kaba la ker kynroh shiteng da ka dewbilat bad sop tnum pat da ka tin. Katei ka iew kan ai jingmyntoi ia ki paidbah nongshong shnong jong ki 50 tam ne duna ki shnong kiba don ha katei ka thaiñ.