Pyrshah Aadhar, ka jingialang Mawkhar

Shillong, 29 Lber:
Ka jingialang kaba la long mynta ka sngi ha Khasi National Dorbar Hall ha Mawkhar ba la pynlong da ka Meghalaya People’s Committee on Aadhaar ba la kyrshan da ka Samaritan Action For Social Transformation (SAST & CASA) ka la shim lai tylli ki rai. Ka rai kaba nyngkong ka long ban pyrshah beit ia ka jingwan pyntreikam ia u Aadhaar Nombar ha kane ka jylla.
Ka rai kaba –ar ka long ban leit pynbna sha ki Distrik bapher bapher da ki jingleit ialap shaphang utei u Aadhaar Nombar ba ki paidbah kim dei ban pdiang da kaba shah pynbor bad ba kan ym don jingktah ia ka jingioh jingmyntoi jong ki na ka sorkar, wat la kim don ia utei u Aadhar nombar. Ka rai kaba lai pat ka long ba katei ka komiti kan thoh sha u myntri rangbah ka jylla u Dr.Mukul Sangma ba um pat dei ban pyntreikam ia utei u nombar katba ka sorkar kam lah ban pynshai sha ki paidbah.
Ha katei ka jing ialang u pastor PBM Basaiawmoit uba khlieh ia katei ka komiti u la ong ba ki briew kiba pyrshah ia u Aadhaar na ka jylla Assam, ruh ki la ong ha u ba donkam ban thaw ia ka joint Action Committee bad ki la bthah ia u ban jied briew 10 ngut na kane ka jylla bad 10 ngut na Assam ban ia kren kham bniah ia katei ka mat bad ban leit ialap kylleng ki jylla bad ia katei ruh u la ong ba la dep ban ia pynbeit bad shen yn sa don ka jingialang ha Guwahati. U pastor u la ong ba ia katei ka mat la pynlong jingialang ha kylleng ki jylla ka thaiñ shatei Lam mihngi bad dang shen dang shu dep ha Manipur.